Shkroi: Fatbardh Dema
“Fatmir Limaj deklarohet nëse ka koalicion mes Vetëvendosjes dhe NISMA-s” mban titullin një artikull i publikuar sot (19 prill).
Artikulli me këtë titull u publikua sot nga portalet informative si “KosovaPost.net” dhe “IndeksOnline.net”.
Çka nuk shkon me këtë titull?
Pas verifikimit të fakteve të kryer nga hibrid.info, u vërtetua se titulli nuk i përgjigjet përmbajtjes.
Në përmbajtje të këtyre artikujve sqarohet se Limaj nuk iu përgjigj gazetarëve nëse ka koalicion me Lëvizjen Vetëvendosje (LVV).
Fatmir Limaj nga subjekti politik “NISMA” para seancës së sotme konstituive të Kuvendit të Kosovës, është pyetur nga gazetarët nëse ka koalicion me LVV-në. Por, ai nuk iu përgjigj gazetarëve në këtë pyetje.
Pra, titulli i artikujve të lartcekur nuk i korrespodon përmbajtjes.
Çka tha Limaj?
“Po shpresoj që Parlamenti i Kosovës, deputetët të votojnë të drejtën tyre – të verifikojnë atë që e ka votuar qytetari i Kosovës – secili duhet ta kryejë detyrën e vetë, këtë çështje teknike dhe shpresoj që këtë ta bëjë secili dhe të filloj funksionaliteti dhe funksionimi i institucioneve”, tha Limaj. (shih këtu)
Analiza:
Disa portale kanë publikuar një artikull me titullin “Fatmir Limaj deklarohet nëse ka koalicion mes Vetëvendosjes dhe NISMA-s”, por pas verifikimit të fakteve nga hibrid.info është konstatuar se titulli është i pavërtetë.
Në përmbajtje thuhet se Limaj nuk është përgjigjur kur është pyetur nga gazetarët për një koalicion me LVV-në, prandaj titulli nuk përputhet me përmbajtjen e artikullit.
Bazuar në metodologjinë e punës, hibrid.info i vlerëson këta artikuj si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.