Medium në gjuhën serbe “happytv.rs” ka publikuar një artikull dje (30 maj) lidhur me një deklaratë rreth zhvillimeve në Kosovë të Mircea Geoană, zëvendës sekretarit të Përgjithshëm të NATO-s.
Artikulli mbanë titullin “ZËRI I ARSYES? Zëvendës Sekretari i Përgjithshëm i NATO-s DËNON REAGIMIN E KFOR-it.
Pas verifikimit të fakteve nga hibrid.info është gjetur se titulli nuk korrespondon me përmbajtjen.
Vegëza e artikullit të publikuar në “happytv.rs”:
Pjesë të artikullit të publikuar në “happytv.rs”:
Zëvendës Sekretari i Përgjithshëm i NATO-s, Mircea Joan, ka dënuar ashpër sot sulmet ndaj forcave të KFOR-it në veri të Kosovës.
Në fakt, përmbajtjen e artikullit, “happytv.rs” e ka marrë nga agjencia e serbe e lajmeve “Tanjug.rs”, por e ka manipuluar përmes titullit, duke mos prezantuar saktësisht deklaratën e Geoană-s.
Përderisa në “tanjug.rs” titulli i këtij artikulli është “Zëvendës Sekretari i Përgjithshëm i NATO-s Mircea Geoana dënoi sulmin ndaj KFOR-it në veri të Kosovës” (këtu), “happytv.rs” ka manipuluar me titullin, duke pretenduar diçka tjetër.
Përmbajtja e artikullit është e bazuar në një deklaratë të përfaqësuesit të NATO-s, Geoană të bërë gjatë një vizite në Malin e Zi, ku foli edhe për sulmin ndaj trupave të KFOR-it në veri të Kosovës.
“NATO dënon ashpër sulmet e djeshme të paprovokuara kundër trupave të KFOR-it në veri të Kosovës. Sulme të tilla janë krejtësisht të papranueshme”. (këtu)
Pra, Geoană ka dënuar sulmin ndaj trupave të KFOR-it në veri të Kosovës, e nuk e ka dënuar reagimin e tyre, siç pretendon mediumi serbe në titull të artikullit lidhur me këtë.
Për më tepër, të paktën 25 ushtarë të misionit paqeruajtës të NATO-s në Kosovë, KFOR, kanë mbetur të plagosur si pasojë e përleshjeve me qytetarët serbë në komunën e Zveçanit në veri të Kosovës, bëri të ditur misioni përmes një njoftimi për media. (këtu)
Analiza:
Titulli nuk i korrespondon përmbajtjes në artikullin e publikuar në mediumi në gjuhën serbe “happytv.rs” lidhur me deklaratën e zëvendës sekretarit të Përgjithshëm të NATO-s, Mircea Geoana për sulmin ndaj trupave të KFOR-it në veri.
Bazuar në metodologjinë e punës, hibrid.info këtë pretendim e vlerëson si “manipulim i fakteve”.
Vlerësimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.