Shkroi: Etrit Rexhepi
Është publikuar një video që shfaq një ekip mjekësor brenda një ambienti spitalor. Në video është vendosur një mbishkrim që pretendon se pamjet tregojnë izolimin e pacientëve në Shkup, të cilët më pas supozohet se ekzekutoheshin gjatë pandemisë.
Përmbajtja me pretendimin e mësipërm është publikuar në 31 dhjetor në TikTok nga një llogari me emrin “joqmacedonia”.
Cila është e vërteta e kësaj përmbajtjeje?
Hibrid.info ka gjetur se pamjet shfaqin momentin e vdekjes së një pacienti në repartin e izolimit në Wuhan të Kinës.
Hibrid.info ka hulumtuar përmes programit të automatizuar të kërkimit, “InVID” dhe ka gjetur të njëjtin video-material të publikuar në llogarinë e mediumit informues “Radio Free Asia” (RFA) në platformën “X” (ish-Twitter).
Videoja ishte publikuar më 1 shkurt, 2020 dhe ka mbishkrimin “[Një skenë dëshpëruese në repartin e izolimit] Në repartin e izolimit të Spitalit Wuhan, momenti më i pakëndshëm për pacientët është të shohin pacientin pranë tyre duke vdekur. Të gjithë janë të shqetësuar se kur do t’u vijë vdekja.”
Në Wuhan ishte shfaqur rasti i parë i koronavirusit, që më vonë shkaktoi pandeminë COVID-19. Wuhan poashtu ishte qyteti i parë në izolim pas pandemisë në janar të vitit 2020.
Analiza:
Pretendimi se një video shfaq pamjet e izolimit të pacientëve në Shkup, të cilët më pas supozohet se se ekzekutoheshin gjatë pandemisë, është i pasaktë.
Në fakt videoja është marrë nga reparti i izolimit të Spitalit Wuhan (në qytetin ku ishte shfaqur së pari koronavirusi), ku tregohet momenti i vdekjes së një pacienti.
Bazuar në metodologjinë e punës, hibrid.info e vlerëson përmbajtjen si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
