Zyra për Kosovën në Qeverinë e Serbisë, dje (21 nëntor) ka publikuar një artikull lidhur me vjedhjen e parave të gatshme në kishën e fshatit Bardhosh të Prishtinës.
Lidhur me këtë rast, ky institucion ka deklaruar se veprimi është kryer nga “ekstremistët shqiptarë”.
Pas verifikimit të fakteve të kryer nga hibrid.info, është vërtetuar se ende nuk dihet se kush janë kryerësit e kësaj vepre.
Vegëza e komunikatës së publikuar në ueb faqen e Zyrë për Kosovën në Qeverinë e Serbisë “kim.gov.rs”:
https://kim.gov.rs/lat/v5390.php
Pjesë nga komunikata e publikuar nga kjo zyrë, e përkthyer në shqip:
Mesazhi i ekstremistëve shqiptarë është shumë i qartë kur ata sulmojnë një kishë që përfaqëson një shtyllë të një kombi, dhe të gjitha incidentet në terren lidhen drejtpërdrejt me deklaratat e rrezikshme dhe ndezëse të politikanëve të Prishtinës, të cilët haptazi duan të shkatërrojnë të gjitha gjurmët e ekzistencës serbe në Kosova.
Në anën tjetër, prifti i kësaj kishe, Aleksandar Nashpaliq, i cili raportoi sulmin në Policinë e Kosovës, në një deklaratë për mediumin serb “radiokim.net” ka sqaruar se persona të panjohur kanë thyer kishën dhe kanë marrë një shumë të vogël parash. (shih këtu)
Gjithashtu, edhe në raportin 24 orësh të Policisë së Kosovës, lidhur me këtë rast thuhet se në Bardhosh “persona të panjohur gjatë muajit nëntor (nuk dihet data) kanë vjedhur para të gatshme”.
Analiza:
Zyra për Kosovën në Qeverinë e Serbisë ka pretenduar pa fakte se vjedhja e kishës në Bardhosh është kryer nga “ekstremistët shqiptarë”.
Nga Policia e Kosovës, si dhe nga prifti i kësaj kishe, sqarohet se persona të panjohur kanë kryer vjedhjen në këtë institucion fetar. Pra, në asnjë rast nuk jepen detaje se kush janë kryerësit e kësaj vepre.
Bazuar në metodologjinë e punës, hibrid.info e vlerëson këtë pretendim të Zyrës për Kosovën në Qeverinë e Serbisë si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.