Artikulli me titull “Fauci paralajmëron pandemi tjetër” është shpërndarë në shumë media kosovare.
Publikimi i këtij lajmi është bërë fillimisht në Koha.net. Mirëpo, në përmbajtje të tekstit nuk gjendet fare pjesa ku epidemiologu amerikan, paralajmëron për ardhjen e një pandemie të re. Siç duket, në këtë publikim është paraqitur vetëm pjesa e parë e intervistës së Fauc-it për “Der Spiegel”, ndërsa paralajmërimi për ardhjen e një pandemie të re është në vazhdimin e artikullit që është i qasshëm vetëm me parapagim të versionit online të gazetës Koha Ditore.
Këtë artikull të pjesshëm e kanë publikuar edhe shumë portale tjera, duke i lënë të mangëta informatat që plotësojnë përmbajtjen e titullit. Kjo ka bërë që titulli të mos korrespondojë me brendësinë e artikullit të shpërndarë.
Vegëzat e artikullit të publikuar në disa media:
Fauci paralajmëron pandemi tjetër
Analizë:
Pas një analize të bërë nga hibrid.info, shihet se mediat e kanë publikuar këtë artikull të pjesshëm, duke mos iu referuar portalit Koha.net. Një praktikë e tillë është duke u përdorur viteve të fundit nga mediat online në Kosovë, të cilat i shpërndajnë artikuj të pjesshëm të gazetës Koha Ditore dhe duke i lënë të cunguara informacionet. Shumica prej këtyre shpërndarjeve, nuk përmbajnë vegëzen e koha.net, atje ku lexuesit mund ta gjejnë artikullin e plotë, duke u bërë parapagues të Kohës Ditore. Duke qenë se artikulli i shpërndarë nga mediat tjera (përjashtuar koh.net), është i pjesshëm dhe nuk përmban fakte që argumentojnë titullin, atëherë ai mund të kategorizohet si “Përmbajtje e pa verifikuar”, pasi që shumica prej këtyre mediave nuk e kanë verifikuar titullin, që do të mund të bëhej përmes kërkimit në publikimet online, apo edhe nga vet gazeta gjermane “Der Spiegel”.
Arsyetimi:
Përmbajtje e pa verifikuar – Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.