Mediumi në gjuhën serbe “Alo.rs” ka publikuar një artikull sot (6 dhjetor) me pretendimin se Xhaka ka veshur fanellën me numër 26 dhe mbishkrimin Jashari për të kremtuar përvjetorin e masakrës ndaj serbëve.
Kjo gazetë hedh pretendimin se numri 26 në fanellën Ardon Jashari, e veshur nga Xhaka pas përfundimit të ndeshjes, simbolizon daljen publike të Ushtrisë Çlirimtare të Kosovës, pra në vitin 1996, ku kishin aksionin e parë të sinkronizuar kur vranë pesë dhe plagosën pesë serbë të tjerë në sulmet në Pejë, Shtime, Deçan, në rrugën Rozhajë – Prishtinë.
Artikulli i kësaj gazete mban titullin “HORROR Pas provokimit të turpshëm nga Xhakës qëndron kremtimi i përvjetorit të masakrës së serbëve!” dhe ka zënë vend edhe në ballinë të gazetës me titull “Festoi masakrën e para 26 vjetëve”. (këtu)
Vegëza e artikullit të publikuar në “Alo.rs”:
Pjesë të artikullit të publikuar në “Alo.rs”:
Një reprezentues i Zvicrës me fanellë me mbiemrin e themeluesit të UÇK-së terroriste dhe numrin 26 lavdëroi krimin ndaj popullit tonë.
Domethënë, UÇK-ja famëkeqe u themelua në vitin 1994, dhe për herë të parë doli në publik në vitin 1996, pra 26 vite më parë! Pastaj terroristët shqiptar kishin aksionin e parë të sinkronizuar kur vranë pesë dhe plagosën pesë serbë të tjerë në sulmet në Pejë, Shtimje, Deçan, në rrugën Rozhaje – Prishtinë.
Një shqiptar kosovar nga radhët e Zvicrës pështyu të gjithë serbët e pafajshëm që vdiqën nga plumbat dhe thika e UÇK-së kriminele dhe terroristit mizor nga Prekazi, të cilin Prishtina e shpalli hero kombëtar të barabartë me Skënderbeun.
Përkundër pretendimeve të mediave serbe se Xhaka ka veshur fanellën me mbishkrimin Jashari duke aluduar në komandantin e UÇK-së, Adem Jasharin, Xhaka deklaroi se këtë veprim e kishte në përkrahje të futbollistit të ri të kombëtares së Zvicrës me origjinë shqiptare, Ardon Jashari të cilit i kishte premtuar se do ta vishte fanellën nëse e fitojnë ndeshjen. (këtu)
Në botërorin “Katar 2022” numri i futbollistëve që kombëtaret kanë drejt të ftojnë është 26 dhe, në mesin e futbollistëve, Ardon Jashari është përzgjedhur ta ketë këtë numër nga Federata e futbollit të Zvicrës. Prandaj, fanella nuk është përzgjedh me qëllimet e pretenduar nga mediat serbe. (këtu)
Pretendimi tjetër se numri 26 simbolizon përvjetorin e daljes së parë publike të Ushtrisë Çlirimtare të Kosovës (UÇK) është i pavërtetë për faktin se UÇK-ja daljen e publike e ka pasur me 28 nëntor 1997, e jo 1996 siç pretendon mediumi serb. Pra, UÇK-ja sivjet feston 25 vjetorin e daljes publike e jo 26 vjetorin siç pretendon gazeta. (këtu, këtu)
Arsyeja që e bëri UÇK-në të dal publikisht, ishte vrasja e mësuesit të shkollës së Llaushës, Halit Gecit, e jo siç pretendohet nga mediat serbe për arsye të sulmeve dhe vrasjeve të serbëve.
Prandaj, pretendimi se është zgjedhur më qëllim fanellën me numrin 26 dhe mbishkrimin Jashari është i pabazë, sepse numri i fanellës nuk mbështet pretendimet serbe.
Analiza:
Mediumi në gjuhën serbe “Alo.rs” ka publikuar një artikull me pretendimin se Xhaka ka veshur fanellën me numër 26 dhe mbishkrimin Jashari për të kremtuar përvjetorin e masakrës ndaj serbëve dhe daljen publike të UÇK-së.
Pretendimet nuk qëndrojnë për faktin se UÇK-ja nuk feston 26 vjetorin e daljes publike, për shkak se ajo publikisht ka dal në vitin 1997, e jo në vitin 1996 siç pretendon gazeta serbe.
Për më tepër, Xhaka ka mohuar mediat serbe se kishte veshur fanellën me mbishkrimin Jashari duke aluduar në mbiemrin komandantin e UÇK-së, Adem Jasharin.
Na bazë të metodologjisë së punës, hibrid.info, vlerëson se ky pretendim nuk qëndron dhe klasifikohet si “manipulim i fakteve”.
Vlerësimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
