Shkroi: Fatbardh Dema
Një mesazh në aplikacionin për komunikim “WhatsApp” po u dërgohet qytetarëve të Kosovës, me pretendimin se vjen nga Facebook/META.
Në këtë SMS pretendohet se përdoruesi i ka shkelur standardet e komunitetit të Facebook, dhe bëhet thirrje të klikohet në një vegëz.
Ky njoftim në formë mesazhi është i shkruar në gjuhën shqipe.
Çka gjeti hibrid.info?
Vegëza e ofruar në përmbajtje është e dyshimtë dhe nuk vjen nga META/Facebook. Po ashtu, numri që ka dërguar këtë SMS ka prefiksin e Vietnamit.
Hibrid.info ka vërtetuar se pasi të klikohet vegëza e ofruar në përmbajtje, tregohet se e njëjta është e dyshimtë. (shih këtu)
Fakt tjetër që ky mesazh elektronik nuk është dërguar nga Facebook, e tregon edhe numri që shfaqet në SMS. Ky numër telefoni ka prefiksin +84, e që pas hulumtimit hibrid.info ka vërtetuar se i njëjti i takon Vietnamit. (shih këtu)
Facebook ka bërë thirrje në lidhje me këto njoftime të rreme, duke sqaruar se nuk duhet t’u besohet këtyre mesazheve elektronike. (shih këtu)
Ju mund t’i besoni një mesazhi nëse adresa përfundon me:
- facebookmail.com (duke përfshirë priority.facebookmail.com )
- facebook.com (duke përfshirë support.facebook.com dhe developers.facebook.com )
- fb.com
- metamail.com
- meta.com
Analiza:
Një mesazh elektronik (SMS) iu është dërguar qytetarëve në WhatsApp, i cili është në gjuhën shqipe dhe pretendon të jetë nga Facebook/META.
Pas verifikimit të fakteve, hibrid.info ka vërtetuar se i njëjti nuk është dërguar nga Facebook dhe përmban një vegëz (link) të dyshimtë.
Gjithashtu, numri që ka dërguar këtë SMS ka prefiksin e Vietnamit.
Bazuar në metodologjinë e punës, hibrid.info e vlerëson këtë SMS si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.