Artikulli me titull “LAJMI FUNDIT/ Edi Rama shoqërohet nga policia, ja çfarë ka ndodhur (Pamje)”, është publikuar nga portali i dyshimtë “gazetaz.com”.
Pas verifikimit të fakteve, hibrid.info ka vërtetuar se lajmi është i vjetër, ndërsa fotografia rezulton të jetë e montuar, përmes përdorimit të aplikacioneve për “cheapfake”.
Në përmbajtje gjendet lajmi i muajit prill, që i referohet një ngjarje që ndërlidhet me kryeministrin e Shqipërisë, Edi Rama, por që nuk ka të bëjë me pretendimin e bërë përmes fotografisë ilustruese të artikullit. Në fakt, lajmi i paraqitur në përmbajtje, lidhet me një incident të kryeministrit Rama, në dhjetor të vitit të kaluar në bordin e avionit të Lufthansa, kur kishte refuzuar ta mbante maskën kundër virusit Korona. E për këtë incident, Rama ishte shoqëruar nga policia federale e Gjermanisë. (shih këtu)
Vegëza e artikullit të publikuar në portalin e dyshimtë “gazetaz.com”:
Artikulli i publikuar nga ky portal i dyshimtë, është shpërndarë edhe në Facebook nga faqja “Specialja”, e cila numëron afër 90 mijë ndjekës. (shih këtu)
Përveç që lajmi është i vjetër, në këtë artikull edhe fotografia është e montuar.
Hibrid.info ka arritur të vërtetojë se në fotografinë reale nuk gjendet kryeministri shqiptar Edi Rama, por personi në këtë foto është Emiljano Shullazi, i cili është arrestuar për disa vepra kriminale.
Fotografinë reale të publikuar nga disa media online, në të cilën shihet momenti i arrestimit të Emiljano Shullazit mund ta gjeni këtu dhe këtu.
Analiza:
Portali i dyshimtë “gazetaz.com” ka publikuar një artikull të muajit prill, e cila kishte të bëjë me shoqërimin e Edi Ramës nga policia federale gjermane në dhjetor të vitit 2021.
Ky portal i dyshimtë, këtij artikulli i ka vënë edhe fotografi jo adekuate, e cila është e montuar.
Në të shihet portreti i kryeministrit shqiptar duke u arrestuar nga policia. Por, gjatë hulumtimit të kryer nga hibrid.info, është vërtetuar se në fotografinë reale gjendet personi me emër Emiljano Shullazi, i cili është arrestuar për disa vepra kriminale.
Gjithashtu, artikulli autentik qw i referohet kwtij incidenti tw kryeministrit Rama, i publikuar nga mediumi gjerman “Spiegel”, nuk ka ndonjw foto ilustruese nga rasti i ngjarjes. Ndërsa ky portal i dyshimtë, i ka vënë artikullit një fotografi të edituar.
Pas verifikimit të fakteve bazuar në metodologjinë e punës, hibrid.info e vlerëson këtë artikull si “Mashtrim”.
