Portali i dyshimtë “GazetaProgresi.com” ka publikuar një artikull me titull “Mustafa: Vetëvendosja nuk dëshiron asgjë që është shqiptare, ata kanë lidhje me Serbi”.
Ky artikull përmban titull dhe përmbajtje të rreme. Edhe pas verifikimit nga hibrid.info përmes makinave të kërkimit dhe rrjeteve sociale, nuk është gjetur asnjë deklaratë e tillë nga kryetari i LDK-së, Isa Mustafa, siç pretendohet në titullin e këtij artikulli. Pra ‘GazetaProgresi.com’ ka sajuar qëllimshëm këtë lajm për të tërhequr audiencën me synimin e përfitimit materialisht përmes klikimeve.
Teksti i artikullit të publikuar në GazetaProgresi.com:
Mustafa: Vetëvendosja nuk dëshiron asgjë që është shqiptare, ata kanë lidhje me Serbi.(VIDEO)
Kryetari i Lidhjes Demokratike të Kosovës, Isa Mustafa ka kritikuar partinë e Lëvizjes Vetëvendosje dhe liderin e saj, Albin Kurti për gjërat jo të mira që po i ndodhin Kosovës në vitet e fundit.
“Vetëvendosja dhe Albin Kurti nuk e duan asgjë që ka lidhje me shqiptarët. Anëtar të LVV-së kanë lidhje me Serbinë. Unë ata do i kisha qu në…
Vegëza e artikullit të publikuar në GazetaProgresi.com:
Analiza:
Titulli dhe përmbajtja e artikullit janë të rreme. Gjithashtu, në titull të këtij shkrimi nga ‘GazetaProgresi.com’ paralajmërohet rrejshëm se në tekst mund të gjendet edhe video e kësaj deklarate. E gjitha kjo bëhet qëllimshëm për të tërhequr lexuesin të klikojë në artikull. Pas verifikimit të bërë nga hibrid.info, ky shkrim kategorizohet si “Lajm i rremë”, “Dezinformatë” dhe “Clickbait”.
Arsyetimi:
Lajm i rremë – Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Dezinformata – Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
