Portali informativ “Insajderi.org” dhe “ABCNews.com” kanë publikuar një artikull me titull “Bëni kujdes! Një bandë hajdutësh elektronikë po zbraz llogaritë bankare”.
Pas verifikimit të fakteve nga hibrid.info, është vërtetuar se titulli është përgjithësues që nuk qartëson se në cilin shtet po ndodhë ky fenomen.
Kjo bëhet e qartë vetëm në përmbajtje, ku thuhet se “një bandë e madhe ‘hajdutësh elektronikë’, me qendër në Athinë dhe që hyn në të gjitha bankat me llogari “false” është duke goditur emra të njohur në Greqi.
Duke e ditur se këto portale kanë audiencë shqipfolëse (shih këtu dhe këtu) dhe shumicën e artikujve që i publikojnë kanë të bëjnë me Kosovën dhe Shqipërinë, kjo lë mundësinë që lexuesit të keqinformohen duke menduar se lajmi ka të bëjë me ndonjërin nga këto shtete, ose me ndonjërën nga bankat që operojnë në to.
Pjesë nga artikulli i publikuar në portalin “Insajderi.org” dhe “ABCNews.al”:
Një bandë e madhe “hajdutësh elektronikë”, me qendër në Athinë dhe që hyn në të gjitha bankat me llogari “false” është duke goditur emra të njohur në Greqi, si biznesmenë, personazhe publike apo edhe qytetarë të pasur.
Grupi kriminal është kthyer në shqetësim të madh për policinë lokale, të cilët kanë nisur “gjuetinë” ndaj tyre. Deri më tani vlerësohet se përmes aksesit ilegal në llogaritë e mijëra personave, ata kanë mundur të vjedhin rreth 5 milion euro.
Vegëzat e artikullit të publikuar në portalin “Insajderi.org” dhe “ABCNews.al”:
Në publikimin e këtij artikulli në faqen zyrtare të Insajderi.org në Facebook, vërehet se lexuesit kanë rënë pre e këtij artikulli, duke aluduar se zbrazja e llogarive bankare nga një grup hajdutësh elektronikë po ndodhë në Kosovë. (shih fotografinë më poshtë)
Analiza:
Portalet “Insajderi.org” dhe “ABCNews.al” kanë publikuar një artikull që ka të bëjë me një grup hajdutësh elektronikë në Greqi, të cilët kanë zbrazur llogaritë e disa personave në këtë shtet.
Mirëpo, në titullin e këtij artikulli nuk qartësohet se në cilin shtet po ndodhë ky fenomen, e që gjithashtu edhe kanë bërë thirrje te lexuesit me fjalët “Bëni kujdes!”, të cilët janë kryesisht shqipfolës.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.