Shkroi: Fatbardh Dema
Është publikuar një imazh në Facebook me mbishkrimin “Babai e bën për spital vajzën 16 vjeçare pasi e gjen në shtrat me të dashurin”.
Ky postim u publikua nga faqen zyrtare në Facebook të portalit informativ “Kosova-sot.info”, të cilës i është bashkangjitur edhe një vegëz që të dërgon në ueb-faqen e këtij mediumi online.
Pas verifikimit të fakteve, hibrid.info ka vërtetuar se mbishkrimi i këtij artikulli është përgjithësues, pasi nuk sqaron se në cilin shtet ka ndodhur ngjarja.
Pasi të klikohet në vegëzën e postimit në Facebook, në përmbajtje të artikullit sqarohet se ngjarja ka ndodhur në Itali.
Portali informativ në fjalë është i regjistruar në Kosovë (shih këtu), andaj si i tillë, titulli në fjalë, lë vend për keqinformim te lexuesit duke i bërë ata që të mendojnë se bëhet fjalë për ngjarje të ndodhur në Kosovë.
Vegëza e postimit të publikuar në Facebook nga faqja e portalit informativ “Kosova-sot.info”:
Pas hulumtimit të kryer përmes makinave online të kërkimit, hibrid.info ka gjetur artikullin e publikuar në median italiane “Italy 24 News”. (shih këtu)
Analiza:
Portali informativ “Kosova-sot.info” ka publikuar një artikull në Facebook lidhur me një ngjarje të ndodhur në Itali, por që në përshkrim të postimit nuk ka sqaruar se ngjarja ka ndodhur në Itali.
Ndërsa vetëm pasi të klikohet vegëza që të dërgon në ueb-faqen e portalit të lartcekur, në përmbajtje të artikullit sqarohet se ngjarja ka ndodhur në qytetin italian, Palermo.
Ky medium online është portal i cili vepron në Kosovë dhe mosdhënia e informacioneve për vendin e ngjarjes, shumë lehtë mund t’i dezinformojë lexuesit, se bëhet fjalë për ngjarja të ndodhur në Kosovë.
Bazuar në metodologjinë e punës, hibrid.info e vlerëson këtë artikull si “Clickbait”.
Vlerësimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
