Agjencia shtetërore serbe e lajmeve “Tanjug” ka publikuar dje (23 shkurt) një artikull me titull “Rakiq: Presioni do të vazhdojë, sulmi u organizua nga Kurti”.
Në këtë lajm është publikuar pretendimi i kryetarit të Listës Serbe, Goran Rakiq, i cili ka akuzuar kryetarin e Lëvizjes Vetëvendosje, Albin Kurti dhe aktivisten politikë serbë të Kosovës, Rada Trajkoviq dhe Nenad Rashiq për organizim të sulmit fizik ndaj të birit të këtij të fundit.
Deklarata e Rakiqit për “tanjug.rs” në gjuhën shqipe:
“Sulmi ndaj djalit të Nenad Rashiqit, Nikolla, është organizuar nga udhëheqësi i Vetëvendosjes, Albin Kurti, dhe se ishte realizuar përmes Rada Trajkoviqi dhe Nenad Rashiqit”, u shpreh Rakiq për Tanjug.rs.
Vegëza e artikullit të publikuar nga “tanjug.rs”:
http://www.tanjug.rs/full-view.aspx?izb=632716
Kjo deklaratë e Rakiqit ishte si kundër-reagim ndaj shqetësimit të shfaqur nga Kurti dhe dy politikanët serbë të Kosovës, Trajkoviq dhe Rashiq.
Kreu i VV-së ka reagur lidhur me sulmin fizik ndaj djalit të Nenad Rashiqit, të cilin e quajti të organizuar duke aluduar se ky sulm ndërlidhet me prindin e viktimës, i cili sipas tij, nuk u thye e as s’u nënshtrua ndaj trysnisë e kërcënimeve të Serbisë.
“Me gjasë, meqë nuk e frikësuan dot Nenad Rashiqin, ia rrahën të birin Nikollën”.
Por në reagimin e tij, Kurti nuk akuzoi individë të caktuar lidhur me këtë sulm, ashtu siç kishte bërë Rakiqi.
Statusi i Albin Kurtit në Facebook lidhur me sulmin fizik ndaj djalit të Nenad Rashiqit:
https://www.facebook.com/albini2017/posts/1076926506140566
Analiza:
Reagimi i udhëheqësit të Listës Serbe, Goran Rakiq, vjen si kundërpërgjigje ndaj deklaratës së Albin Kurtit dhe dy politikanëve serbë të Kosovës, Rada Trajkoviq dhe Nenad Rashiq. Rakiq me këtë deklaratë të pabazuar në asnjë fakt, ka dashur që ta largoj vëmendjen përmes metodës së Spin-it nga akuzat e bëra nga adresa politike të Kosovës në drejtim të Beogradit zyrtar për përgjegjësinë ndaj sulmit të Nikolla Rashiqit. Për këtë arsye, hibrid.info këtë deklaratë të Rakiqit e vlerëson si “Spin” dhe “Përmbajtje të pa verifikuar”.
Arsyetimi:
Vlerësimi “Spin” i jepet një raporti mediatik me të cilin autori përpiqet të largojë vëmendjen e publikut nga disa përmbajtje ose fakte të tjera që raportohen në media në atë kohë. Karakteristikë e raporteve të tilla në media është përpjekja që ato të ndodhin kryesisht si reagim ndaj një raporti tjetër mediatik ose një ngjarje aktuale nga e cila dikush dëshiron të largojë vëmendjen, dhe e cila është e pafavorshme për disa akterë, kryesisht politikë. Ky vlerësim është pra specifik për faktin se mund të varet nga faktorë të jashtëm, siç janë rastet kur një medium i veçantë injoron lajmet e tanishme të pafavorshme nga njëra anë, dhe në të njëjtën kohë publikon përmbajtje që është e pafavorshme nga ana tjetër.
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
