Artikulli me titull “Vjen lajmi BEFASUES nga Gjykata Speciale, Kadri Veselit mund të mos kthehet më në Hagë”, është publikuar nga portali i dyshimtë “postlajme.net”.
Nga verifikimi i fakteve i kryer nga hibrid.info, rezulton që ky artikull përmban titull të rremë, i cili në asnjë rast nuk përputhet me përmbajtjen në tekst.
“Postlajme.net” ka marrë këtë artikull nga “gazetaexpress.com” ku në një përgjigje me shkrim për këtë portal, zëdhënësja e Dhomave të Specializuara, Angela Griep, ka thënë se nuk mund të japin informacione shtesë lidhur me qëndrimin e ish kreut të PDK-së në Kosovë.
“Për arsye operacionale dhe për të respektuar privatësinë e Z. Veseli, ne nuk mund të japim ndonjë informacion shtesë mbi vizitën e kujdestarisë”.
Pra, nuk është e vërtetë që Veseli mund të mos kthehet më në Hagë, siç pretendohet rrejshëm në titullin e artikullit të publikuar në “postlajme.net”.
Vegëza e artikullit të publikuar në portalin e dyshimtë “postlajme.net”:
Më poshtë mund të gjeni artikullin autentik të publikuar nga portali “gazetaexpress.com”:
Analiza:
Portali i dyshimtë “postlajme.net” ka përdorur një artikull të publikuar nga “gazetaexpress.com”, të cilit i ka vënë titull të rremë.
I njëjti artikull është shpërndarë edhe në Facebook nga faqja “33shi.com”, duke grumbulluar mbi 100 reagime dhe 30 komente.
Pas analizës së kontrollit të fakteve, hibrid.info e vlerëson këtë tekst si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
