Faqja në Facebook me emrin “Lexo Sot” dje (10 gusht) ka publikuar një artikull me titull “E FUNDIT/ Shtohet prezenca e xhandarmërisë serbe në kufi me Kosovën duke e…”.
Pas verifikimit të fakteve, hibrid.info ka vërtetuar se ky artikull përmban titull të sajuar, i cili nuk i përgjigjet përmbajtjes.
Në përmbajtje gjendet lajm i vjetër (24 shkurt), atëkohë kur kryetari i Bashkësisë Lokale në fshatin e zonës kufitare Kosovë-Serbi, në Breznicë, komuna e Kamenicës, kishte njoftuar se shteti i Serbisë e ka shtuar prezencën ushtarake në këtë fshat, duke e rrethuar nga të gjitha anët e duke shtuar panik tek bashkëfshatarët.
Faqja e lartcekur e ka postuar këtë lajm të vjetër me pretendimin ta paraqes si aktual, duke i shtuar në titull cilësimin “E FUNDIT”, me pretekstin që të duket si lajm aktual.
Vegëza e artikullit të publikuar në Facebook nga faqja “Lexo Sot”:
Pas hulumtimit të kryer përmes makinave online të kërkimit, hibrid.info ka arritur të gjejë artikullin me njoftimin e kryetarit të Bashkësisë Lokale në Breznicë të bërë më 24 shkurt, e të publikuar në disa media onlinë në Kosovë. (shih këtu dhe këtu)
Analiza:
Faqja në Facebook me emrin “Lexo Sot”, dje (10 gusht) ka publikuar një artikull të muajit shkurt të këtij viti, me pretendimin ta paraqesë si aktual.
Pas analizës së kontrollit të fakteve, bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
