Portali i dyshimtë me përmbajtje në gjuhën shqipe “todaynews80.com” ka publikuar sot (22 shtator) një artikull me titull “Rritet cmimi i bukës”.
Pas verifikimit të fakteve të kryer nga hibrid.info, është vërtetuar se titulli i këtij artikulli është i sajuar, i cili nuk i përgjigjet përmbajtjes.
Në përmbajtje gjendet artikulli i publikuar nga portali informativ “Telegrafi.com” me titull “Si janë ngritur çmimet e bukës në Evropë”. Pra në titullin e artikullit të “Telegrafi.com” bëhet e qartë për vendet ku janë rritur çmimet e këtij produkti, gjë që nuk ndodhë edhe në artikullin e “Todaynews80.com”.
Në fakt, “Todaynews80.com” ka publikuar këtë artikull të marrë nga “Telegrafi.com” të cilit i ka vënë titull të pasaktë “Rritet çmimi i bukës”.
Duke e ditur se ky portal i dyshimtë shumicën e lajmeve që i publikon kanë të bëjnë me Kosovën (shih këtu), lë mundësi që një titulli i tillë t’i dezinformojë lexuesit duke i bërë të mendojnë se ka rritje të çmimit të bukës në Kosovë.
Vegëza e artikullit të publikuar në portalin e dyshimtë “todaynews80.com”:
Ky artikull me titull të pasaktë është shpërndarë edhe në Facebook nga faqja “Post Lajme”, e cila numëron mbi 16 mijë ndjekës. (shih këtu)
Pas hulumtimit të kryer përmes makinave online të kërkimit, hibrid.info ka gjetur artikullin e publikuar nga portali “Telegrafi.com”, i cili është cituar nga portali i dyshimtë “todaynews80.com”. (shih këtu)
Për ta qartësuar edhe më shumë faktin se nuk ka ngritje të çmimit të bukës në Kosovë, hibrid.info ka gjetur të dhënat nga Agjencia e Statistikave të Kosovës (ASK), që tregon se aktualisht çmimi për një bukë është 0.50 euro. (shih këtu)
Analiza:
Portali i dyshimtë “todaynews80.com” ka publikuar një artikull të marrë nga Telegrafi.com, i cili flet për shtrenjtimin e çmimit të bukës në shtetet e Bashkimit Evropian, që periudha kur ka nisur agresioni rus në Ukrainë.
Mirëpo, ky portal i dyshimtë këtij artikulli i ka vënë titullin “Rritet çmimi i bukës”.
Duke e ditur se ky portal i dyshimtë shumicën e lajmeve që i publikon kanë të bëjnë me Kosovën, kjo mund t’i dezinformojë lexuesit duke i bërë të mendojnë se rritja e çmimit të bukës ka të bëjë me Kosovën.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
