Llogaria në Facebook me emrin “Al Khattab” ka publikuar dje (20 tetor) një video-material që shfaq momente të lansimit të një rakete.
Kjo llogari me anë të mbishkrimit pretendon se pamjet tregojnë lansimin e raketës, e cila ka cak Izraelin.
Por pas hulumtimit të fakteve nga hibrid.info, është kuptuar se video-materiali është i vjetër dhe në fakt, nuk ka të bëjë me konfliktin ndërmjet Izraelit dhe Hamasit.
Vegëza e video-materialit të publikuar në Facebook nga llogaria “Al Khattab”:
Pas hulumtimit të kryer përmes programit të automatizuar “InVID”, hibrid.info ka gjetur se video-materiali është i vitit 2021 dhe paraqet momente të lansimit të një rakete nga Jemeni, e cila kishte si cak Riadin, kryeqytetin e Arabisë Saudite (shih këtu).
Hibrid.info vlerëson se autori duke u nisur nga situata aktuale në Lindjen e Mesme, ka përdorur imazhin e lansimit të një rakete duke e kontekstualizuar me konfliktin Izrael-Hamas.
Analiza:
Një llogari në Facebook ka publikuar një video-material me mbishkrimin që pretendon se po shfaq lansimin e një rakete me cak shtetin e Izraelit.
Por që pas verifikimit nga hibrid.info, është gjetur se bëhet fjalë për nje video të vjetër, e cila ndërlidhet me një lansim të raketës nga Jemeni në Arabinë Saudite, në vitin 2021.
Andaj edhe bazuar në metodologjinë e punës, hibrid.info e vlerëson këtë përmbajtje si, “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.