Portali informativ “ntv.al” ka publikuar dje (11 mars) një artikull me titullin “KFOR çon dinarë në Kosovë/ Largohen britanikët”.
Pas verifikimit të fakteve të kryer nga hibrid.info, është vërtetuar se titulli i këtij artikulli nuk përputhet me përmbajtjen.
Në përmbajtje kuptohet se sekretari shtetëror në Ministrinë e Mbrojtjes në Serbi, Nemanja Staroviq, duke folur rreth çështjes së dinarit në Kosovë, është shprehur se KFOR-i përkohësisht do të mund të merrte për përgjegjësinë për transportin e parave për të furnizuar bankën.
Nisur nga rëndësia e titullit në strukturën e një artikulli (këtu), shpërputhja e informacionit që jepet në titull me atë që tregohet në përmbajtje, në këtë rast mund të kuptohet si tendencë manipulimi për lexuesit, të cilët mund ta marrin informacionin e paraqitur në titull si të mirëqenë.
Vegëza e artikullit të publikuar në portalin informativ “ntv.al”:
Pas hulumtimit të kryer nga hibrid.info, është gjetur intervista e Staroviq-it dhënë për “Zërin e Amerikës” në shërbimin në gjuhën boshnjake. (shih këtu)
Staroviq i pyetur rreth vendimit të Bankës Qendrore të Kosovës (BQK) për ta bërë euron valutë të vetme legale në Kosovë, u përgjigj duke bërë apel tek partnerët ndërkombëtarë që të reagojnë sipas sistemit të masave urgjente – ad hoc, që sipas tij kjo të bëhet në mënyrë që paratë të transportohen njëjtë si në njëzet e pesë vitet e mëparshme.
Po ashtu ai tha se beson që KFOR-i përkohësisht do të mund të merrte përgjegjësinë për transportin e parave.
“Atë punë e kryen një kompani britanike, e cila është e licencuar në Prishtinë. Nëse nuk ka kush tjetër që ta sigurojë, ajo që thashë ditët e kaluara – është se besoj se KFOR-i, së paku përkohësisht, do të mund të merrte përgjegjësinë për transportin e parave për të furnizuar Bankën postare të kursimeve”, tha Staroviq për “Zërin e Amerikës”.
Zyra për Kosovën në Qeverinë e Serbisë njoftoi të hënën se Banka e Postës e Serbisë i ka hapur katër degë të improvizuara bankare në afërsi të pikëkalimeve kufitare me Kosovë, në të cilat, sipas saj, serbët e Kosovës mund t’i tërheqin të ardhurat e tyre nga shteti serb. (shih këtu artikullin e publikuar nga Radio Evropa e Lirë)
Pra, siç shihet në asnjë rast KFOR-i nuk ka marr përgjegjësi për transportin e parave (dinarit) në Kosovë, siç paraqitet përmes titullit në artikullin e “ntv.al”.
Analiza:
Pretendimi i titullit të një artikulli të publikuar nga “ntv.al”, në të cilin thuhet se KFOR-i çon dinarët në Kosovë, nuk është i qëndrueshëm.
Informacioni i publikuar është bazuar nga deklarata e sekretarit shtetëror në Ministrinë e Mbrojtjes në Serbi, Nemanja Staroviq, i cili ka thënë se KFOR-i përkohësisht do të mund të merrte përgjegjësinë për transportin e parave për të furnizuar Bankën postare të kursimeve.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.