Shkroi: Etrit Rexhepi
Është publikuar një përmbajtje me mbishkrimin “Zyrtarizohet koalicioni LVV-PDK, një ditë pas zgjedhjeve parlamentare”.
Ky postim është publikuar të hënën (29 dhjetor) në Facebook, në faqen e mediumit “Paparaci.com”.
Çka nuk shkon me përmbajtjen?
Informacioni i paraqitur në mbishkrim është përgjithësues, pasi nuk tregon që bëhet fjalë për arritjen e një koalicioni lokal mes LVV-së dhe PDK-së.
Siç shihet edhe në fotografi, postimit i është bashkangjitur një vegëz, e cila shfaq të njëjtin informacion si në mbishkrim.
Në bazë të komenteve në postim, vërehet se përdoruesit kanë komentuar mbi vërtetësinë e informacionit të paraqitur, madje në disa prej komenteve lajmi merret si nje njoftim për koalicion ndërmjet dy subjekteve politike në nivel qendror.
Pas klikimit të vegëzës, paraqitet artikulli i titulluar, “Zyrtarizohet koalicioni LVV-PDK në Podujevë, një ditë pas zgjedhjeve parlamentare” (shih këtu).
Çka tregon se për dallim nga mbishkrimi i këtij postimi në Facebook, brenda artikullit sqarohet vendi i ngjarjes së ndodhur.
Hibrid.info gjeti një publikim në Facebook, në llogarinë e Shpejtim Bulliqit, kryetarit të Komunës së Podujevës, i cili ka postuar një fotografi bashkë me Isak Shabanin, kryesuesin e ri të zgjedhur të Kuvendit Komunal, i cili vjen nga radhët e Partisë Demokratike të Kosovës (shih këtu).
Në postim ai e ka uruar Shabanin për detyrën e re, duke i ofruar bashkëpunim për të mirën e qytetarëve të Podujevës.
Analiza:
Mbishkrimi i postimit në Facebook paraqet në mënyrë të përgjithësuar informacionin për zyrtarizimin e një koalicioni ndërmjet LVV-së dhe PDK-së, pa sqaruar se bëhet fjalë për një marrëveshje në nivel lokal.
Informacioni i paraqitur në këtë mënyrë mund të krijojë përshtypjen e një koalicioni në nivel qendror, meqë përmenden zgjedhjet parlamentare, gjë që vërehet edhe nga komentet e përdoruesve.
Andaj, bazuar në metodologjinë e punës, hibrid.info e vlerëson këtë përmbajtje si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.