Shkroi: Fatbardh Dema
Përmes një video-materiali pretendohet se pamjet paraqesin një emigrant shqiptar në Itali duke plaçkitur në rrugë një grua të moshuar.
Ky postim me këtë pretendim u publikua në X nga llogaria në gjuhën angleze “VukFeNix” me datë 13 mars.
Postimi i përkthyer në shqip:
Në Trieste të Italisë, një grua 78-vjeçare ishte duke ecur në këmbë kur u ndesh brutalisht nga një emigrant ilegal shqiptar. Ai i vodhi gjerdanin e saj prej floriri, dhuratë që i kishte bërë i shoqi i ndjerë shumë vite më parë.
Cila është e vërteta?
Pas hulumtimit online të kryer nga hibrid.info, u vërtetua se pretendimi është i rremë. Pra, grabitësi nuk ka kombësi shqiptare.
Hibrid.info përmes programit të automatizuar “InVID”, ka arritur të gjejë artikullin e publikuar në mediumin online në Itali “ilpiccolo.it”. Në këtë artikull sqarohet se është identifikuar ky person dhe se i njëjti është maroken.
Pjesë nga artikulli i publikuar në “ilpiccolo.it”, i përkthyer në shqip:
“Ky është një maroken 23-vjeçar, i cili kërkohet në të gjithë Italinë: ai ishte larguar nga qyteti dhe ndoshta ndodhet në Lombardi”.
“Përparim në hetimin e grabitësit në Via Foscolo që kishte sulmuar dhe grabitur një të moshuar. Burri është identifikuar: është një maroken njëzet e tre vjeç, 1.94 metra i gjatë”.
Analiza:
Përmes një videoje të shpërndarë në platformën X pretendohet se një emigrant ilegal shqiptar kishte plaçkitur një grua të moshuar në Trieste të Italisë.
Megjithatë, pas një hulumtimi nga platforma Hibrid.info, u vërtetua se ky pretendim është i rremë. Autori është një shtetas maroken.
Bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
