Llogaria në TikTok me emrin “babajaga454” ka publikuar sot (10 nëntor) një video-material me imazhin e ish-presidentit të Kosovës, Hashim Thaçi.
Imazhit i është bashkangjitur mbishkrimi që pretendon se Thaçi ka pësuar “sulm në kokë” sipas gazetës “The Times”.
Por pas verifikimit të fakteve nga hibrid.info, nuk janë gjetur fakte që e provojnë pretendimin e publikuar nga llogaria në fjalë.
Vegëza e video-materialit të publikuar nga llogaria “babajaga454”:
https://www.tiktok.com/@babajaga454/video/7299788013092064545
Nisur nga fakti që llogaria në fjalë thotë se pretendimin e bazon nga raportimi i gazetës britanike “The Times”, hibrid.info ka hulumtuar në ueb-faqen të kësaj gazete.
Pas hulumtimit në hapësirën për kërkime “Search” me emrin e ish-presidentit Thaçi, ueb-faqja nuk ka gjeneruar informatat e pretenduara në publikimin e llogarisë (shih këtu).
Poashtu edhe në ueb-faqen zyrtare të Gjykatës Speciale në rubrikën e lajmeve, nuk ka asnjë njoftim gjatë ditëve të fundit në lidhje me ish-presidentit Thaçi (shih këtu).
Ndërsa edhe në njoftimet e ueb-faqes së Partisë Demokratike të Kosovës (PDK), subjekt politik ky që dikur udhëhiqej nga Thaçi, nuk konfirmohet pretendimi për gjendjen shëndetësore të ish-presidentit (shih këtu).
Një pretendim të ngjashëm mbi ish-presidentin Thaçi, hibrid.info e kishte verifikuar edhe më herët (shih këtu).
Analiza:
Llogaria “babajaga454” në TikTok ka pretenduar rrejshëm sot (10 nëntor) se ish-presidenti i Kosovës Hashim Thaçi ka pësuar “sulm në kokë”.
Pas konsultimit me burimet zyrtare kredibile që mund të japin informacione për ish-presidentin Thaçi, siç janë kanalet online të Gjykatës Speciale, PDK-së apo edhe gazeta “The Times” të cilës i është referuar llogaria “babajaga454” në pretendim, i njëjti rezultoi të jetë i rremë.
Në asnjë nga këto burime nuk janë gjetur njoftime zyrtare me përmbajtje të pretendim të tillë.
Bazuar në metodologjinë e punës, hibrid.info e vlerëson këtë pretendim si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
