Disa media në gjuhën shqipe, duke ju referuar artikullit të publikuar së pari në portalin informativ “tesheshi.com”, kanë publikuar lajmin mbi pretendimin se Erdogan e paralajmëron Vuçiqin në lidhje me Kosovën gjatë një bisede telefonike.
Mirëpo, përkundër hulumtimit përmes makinave digjitale të kërkimit, hibrid.info nuk ka arritur të konfirmojë këtë pretendim të ngritur. Rrjedhimisht, nga ky hulumtim, nuk është arritur të gjendet asnjë publikim kredibil e serioz nga burime zyrtare e mediatike turke, që të ketë ngjashmëri me këtë pretendim të bërë nga mediumi “tesheshi.com”.
Lajmi është publikuar dje (2 gusht) me titull “Kosova, Erdogan paralajmëron Vuçiqin: S’është Turqia e ‘90-ës!” ku thuhet se presidenti i Turqisë, Recep Tayyip Erdogan, ka pasur një bisedë të tensionuar telefonike me presidentin Aleksandër Vuçiq në lidhje më zhvillimet e fundit në veri të Kosovës.
Autori, duke u bazuar në, siç i referohet, burime kredenciale, pretendon se Presidenti i Turqisë ka paralajmëruar atë të Serbisë, se duhet të ndryshojë qasjen ndaj Kosovës dhe se për çdo hap ndaj Kosovës, siç thuhet shkruhet, do ta:
“ketë përballë Turqinë, tashmë një fuqi e rikthyer ekonomike, ushtarake dhe diplomatike në nivel global”.
Në përmbajtje, duke vazhduar t’iu referohen burimeve kredenciale, pretendohet se gjuha e presidentit turk, siç shkruan, ka qenë e prerë, “duke e këshilluar, por më së shumti paralajmëruar Vuçiqin, që të mos vijojë më me kërcënime apo dhe me romantizime ndaj Kosovës” pasi që siç, thuhet tutje në artikull Erdogan ia ka “bërë të qartë presidentit serb se nuk do ketë asnjë lëshim apo tolerim po u cenua Kosova”.
Vegëza e artikullit të publikuar nga mediumi “Tesheshi.com”:
Kosova, Erdogan paralajmëron Vuçiçin: S’është Turqia e ‘90-ës! – Te Sheshi
I njëjti artikull është publikuar edhe në disa media tjera (shih vegëzat Erdogan e paralajmëron Vuçiçin ashpër për Kosovën: S’është Turqia e ‘90-ës – Almakos.com dhe Kosova, Erdogan paralajmëron Vuçiçin: S’është Turqia e ‘90-ës! – kosovapost.net), të cilat u janë referuar artikullit të “Tesheshi.com”.
Artikulli bazohet në burim kredencial, duke mos sqaruar për institucionin apo vendin (shtetin/qytetin) nga i cili vjen ky burim informacioni.
Për më tepër Hibrid.info nuk ka gjetur asnjë informacion zyrtar apo publik kredibil që e konfirmon pretendim për këtë lloj “paralajmërimi” të bërë nga Presidenti i Turqisë ndaj atij të Serbisë.
Nuk ka asnjë njoftim nga Presidenca e Turqisë (këtu) për ndonjë bisedë të mundshme telefonike mes dy presidentëve, atij turk dhe serb.
Po ashtu, ky lajm, për shkak se nuk figuron në kanalet zyrtare të Republikës se Turqisë dhe në mediumet kryesore atje, vlerësohet si i pa verifikuar.
Analiza
Disa mediume në gjuhën shqipe kanë publikuar një lajm që pretendon se Presidenti i Turqisë e ka paralajmëruar presidentin e Serbisë, Vuçiq në lidhje me zhvillimet e fundit në veriun e Kosovës.
Pretendimet për një bisedë telefonike ndërmjet Presidentit të Turqisë, Erdogan, me presidentin e Serbisë, Vuçiq në lidhje me zhvillimet e fundit në veriun e Kosovës nuk janë të konfirmuara. Po ashtu, pretendimi për deklarata paralajmëruese të Presidentit Erdogan ndaj Presidentit Vuçiq, përveç në mediat e trajtuara, nuk figuron në kanalet zyrtare të Republikës se Turqisë dhe mediave qendrore atje.
Pas verifikimit të fakteve bazuar në metodologjinë e punës, hibrid.info e vlerëson këtë artikull si “Përmbajtje e pa verifikuar”.
Arsyetimi:
“I pa verifikuar” klasifikohen ato raporte mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
