Portali “Kosova-sot.info” ka publikuar një artikull me titull “Hakerët rusë sulmojnë SHBA’të, Gjermaninë derisa Kosovën…!”.
Pas verifikimit të fakteve, hibrid.info ka vërtetuar se titulli i këtij artikulli është tendencioz, pasi në të përmendet Kosova. Ndërsa në përmbajte paraqitet një lajm i cili nuk ndërlidhet fare me Kosovën.
Në përmbajtje bëhet e ditur se grupi i hakerëve rusë, i quajtur “Killnet”, kanë njoftuar nisjen e një sulmi kibernetik global kundër SHBA-ve, Gjermanisë, Britanisë së Madhe, Italisë, Letonisë, Rumanisë, Lituanisë, Estonisë, Polonisë, Ukrainës.
Pra, lajmi nuk ka të bëjë me shtetin e Kosovës, siç pretendohet në titull.
Vegëza e artikullit të publikuar në portalin “Kosova-sot.info”:
https://www.kosova-sot.info/lajme/619363/hakeret-ruse-sulmojne-shbate-gjermanine-derisa-kosoven/
Ky artikull i referohet mediumit të pavarur bjellorus “Nexta TV”, e cila përmes faqes së saj zyrtare në Twitter ka raportuar për këtë sulm kibernetik.
“Hakerët rusë Killnet njoftuan nisjen e një sulmi kibernetik global në SHBA, Mbretëri të Bashkuar, Gjermani, Itali, Letoni, Rumani, Lituani, Estoni, Poloni dhe Ukrainë”, shkruan në njoftimin e Nexta TV në Twitter (shih këtu)
Analiza:
Portali “Kosova-sot.info” ka publikuar një artikull që ka të bëjë me një sulm kibernetik nga grupi rus “KILLNET”, i cili ka njoftuar për nisjen e këtij sulmi global ndaj disa shteteve.
Por, portali i lartcekur në titull ka vendosur edhe emrin e Kosovës, duke lënë të kuptohet se grupi i hakerëve ka nisur sulm kibernetik edhe ndaj shtetit kosovar.
Ndërsa me të hyrë në tekst bëhet e ditur se lajmi nuk ka të bëjë me Kosovën. Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.