Portali i dyshimtë me përmbajtje në gjuhën shqipe “analiza.albaniaarticle.info” dje (21 gusht) ka publikuar një artikull me titull “Policia e Kosovës i tregon ‘muskujt’: I ‘arreston spiunët’ e Serbisë në këtë qytet”.
Pas kontrollit të fakteve të kryer nga hibrid.info është vërtetuar se titulli është i sajuar, i cili nuk përputhet me përmbajtjen.
Në përmbajtje gjendet lajm i vjetër, i publikuar më 7 korrik nga portali informativ “lajmi.net”, i cili ka të bëjë me aksionin e Policisë së Kosovës në qytetin e Shtërpcës, atëkohë kur janë larguar kamerat e vendosura ilegalisht nga strukturat serbe, si dhe ishte arrestuar ish kryetari i komunës, Bratisllav Nikoliq, si i dyshuar për koordinim të këtyre aktiviteteve.
Vegëza e artikullit të publikuar nga portali i dyshimtë “analiza.albaniaarticle.info”:
Artikulli i publikuar nga ky portal i dyshimtë i lartcekur është shpërndarë sot (22 gusht) edhe në Facebook nga faqja “Analiza”, e cila numëron afër 60 mijë ndjekës. (shih këtu)
Pas hulumtimit të kryer përmes makinave online të kërkimit, hibrid.info ka arritur të gjejë artikullin e publikuar në “lajmi.net”, i cili është marrë nga portali i dyshimtë “analiza.albaniaarticle.info”, duke i ndryshuar titullin. (shih këtu)
Lidhur me këtë aksion të Njësisë Speciale në Shtërpcë, kishte folur edhe prokurori Rasim Maloku. Ai kishte thënë se i arrestuari Nikolliq, akuzohet për vendosjen e këtyre kamerave vëzhguese në mënyrë ilegale, veprim ky i bërë nga strukturat ilegale serbe.
“Ky aksion nuk lidhet direkt me ndërtimet pa leje në Brezovicë por ndërlidhet me disa të arrestuar të Brezovicës pasi që njëri nga ta, përkatësisht ish kryetari i komunës Bratisllav Nikoliq është edhe koordinator i strukturave ilegale e që këto struktura kanë menaxhuar me kamerat e sigurisë që kanë monitoruar lëvizjet e qytetarëve dhe institucionet publike të Republikës së Kosovës e që këto informacione janë përcjellë në strukturat e sigurisë në Serbi”, ishte shprehur Maloku për Kallxo.com. (shih këtu)
Analiza:
Portali i dyshimtë “analiza.albaniaarticle.info” dje (21 gusht) ka publikuar një artikull të vjetër të muajit korrik lidhur me aksionin e Njësisë Speciale në Shtërpcë , ku ishte arrestuar ish kryetari i kësaj komune – Bratisllav Nikoliq.
Mirëpo, këtë artikull ky portal i dyshimtë është munduar ta paraqesë si aktual, duke i vënë titull të rremë me pretendimin se Policia e Kosovës ka arrestuar spiunë nga Serbia.
Bazuar në metodologjinë e punës, hibrid.info e vlerëson këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.