Portali i dyshimtë “mergimtarshqip.com” ka publikuar një artikull me titull “Ja ligji papritur që u vendos nga Qeveria për cmimin e naftes”.
Nga verifikimi i fakteve, hibrid.info ka vërtetuar se titulli i këtij artikulli është i sajuar, i cili nuk i përgjigjet përmbajtjes.
Në përmbajtje gjendet lajmi lidhur me një kërkesë të partive opozitare dhe bizneseve drejtuar organeve qeveritare për heqjen e akcizës në mënyrë që të zbutet çmimi i naftës, por që një gjë e tillë është hedhur poshtë nga ministri i Financave, Hekuran Murati.
Vegëza e artikullit të publikuar në portalin e dyshimtë “mergimtarshqip.com”:
Ky artikull me titull të sajuar është shpërndarë në Facebook nga faqja “Gazeta”, e cila numëron mbi 200 mijë ndjekës. (shih këtu)
Pas hulumtimit përmes makinave online të kërkimit, hibrid.info ka arritur të gjejë artikullin autentik, i publikuar nga portali me përmbajtje në gjuhën shqipe “albinfo.ch”, të cilin e ka postuar portali i dyshimtë “mergimtarshqip.com” duke i ndryshuar titullin. (shih këtu)
Njoftimin e ministrit të Financave, Hekuran Murati, i cili tha se “Thirrjet për ulje të akcizës së naftës janë thirrje për trashje të fitimit të tregtarëve”, mund ta gjeni këtu.
Pretendimi i bërë në titull ku thuhet “ligji i bërë nga Qeveria” bie ndesh edhe me kompetencat dhe pushtetin që kanë nivelet e pushtetit në Kosovë, të përcaktuar me Kushtetutë, pasi që Qeveria nuk është organ që miraton ligje, por i zbaton ato dhe aktet e tjera të miratuara nga Kuvendi i Kosovës. (shih këtu)
Analiza:
Portali i dyshimtë “mergimtarshqip.com” ka publikuar një artikull lidhur me subjektet opozitare dhe bizneset të cilat kanë kërkuar heqjen e akcizës në mënyrë që të zbutet çmimi i naftës, por që një gjë e tillë nuk është aprovuar nga ministri i Financave, Hekuran Murati.
Këtij artikulli, ky portal i dyshimtë i ka vendosur titullin e sajuar “Ja ligji papritur që u vendos nga Qeveria për cmimin e naftes”.
Nga analiza e kontrollit të fakteve bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
