Disa media online në Kosovë si “Nacionale.com” dhe “Kosova-sot.info” kanë publikuar një artikull me titull “Bukëpjekësit paralajmërojnë rritje drastike të çmimeve: Buka së shpejti mund të bëhet 10 euro”.
Me të hyrë në tekst, bëhet e ditur se lajmi ka të bëjë me Gjermaninë. Duke e ditur se këto portale janë të regjistruara në Kosovë dhe shumicën e audiencës e kanë kosovarë, mund të aludohet se shtrenjtimi i bukës në 10 euro është bërë në Kosovë.
Pjesë nga artikulli i publikuar në këto portale:
Për shkak të luftës në Ukrainë, çmimet e lëndëve të para, duke përfshirë drithërat, miellin dhe majanë, aktualisht janë duke shënuar rritje të mëdha. Në të gjithë Gjermaninë, furrat e bukës dhe bukëpjekësit janë goditur drejtpërdrejt nga rritja e çmimeve.
Nëse vazhdon kështu, Shoqata e Bujqve në Gjermani bën të ditur se buka së shpejti do të mund të kushtojë dhjetë euro, shkruan Handelsblatt.
Vegëzat e artikullit të publikuar në portalet “Nacionale.com” dhe “Kosova-sot.info”:
Artikullit të cilit i referohen këto portale është publikuar në mediumin online gjerman “Handeslbadt”, ndërsa hibrid.info e ka gjetur të njëjtin të postuar në mediumin tjetër gjermann “HNA.de”. (shih këtu)
Në titullin e këtij artikulli shtrohet pyetja se a do të rritet çmimi i bukës në 10 euro.
Megjithatë, në përmbajtje gjendet një deklaratë e drejtorit të Përgjithshëm të Shoqatës Qendrore të Tregtisë Gjermane të Bukës, Daniel Schneider, i cili tha se “ne jemi ende shumë larg pagesës së dhjetë eurove për një copë bukë”.
Analiza:
Portalet “Nacionale.com” dhe “Kosova-sot.info” kanë publikuar një artikull lidhur me mundësinë e rritjes së çmimit të bukës në 10 euro.
Lajmi ka të bëjë me shtetin e Gjermanisë, ndërsa në titullin e artikullit të publikuar nga portalet e lartcekura nuk tregon se për cilin shtet bëhet fjalë.
Duke e ditur se këto portale janë të regjistruara në Kosovë dhe shumicën e lexuesve i kanë kosovarë, kjo lë të kuptohet se lajmi ka të bëjë me shtetin tonë. Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
