Janë publikuar artikuj me lajme kundërthënëse në mediat në gjuhën shqipe, lidhur me rezultatin e zgjedhjeve në vendvotimin numër 6 në Tërnoc të Bujanocit.
Disa media kanë publikuar lajme se Shaip Kamberi, kandidat nga subjekti “Koalicioni i Shqiptarëve” nga Lugina e Preshevës, ka arritur të merr rezultat që i siguron pozitën e deputetit në Parlamentin e Serbisë.
Por, këto pretendime i ka hedhur poshtë vetë kandidati për deputet në Parlamentin e Serbisë, Shaip Kamberi.
Në bazë të hulumtimit të kryer nga hibrid.info, portali “Presheva.al” ka raportuar e para se Shaip Kamberi ka fituar mandatin e deputetit në Parlamentin e Serbisë, por këtë pretendim nuk e bazon në asnjë fakt.
Vegëza e artikullit të publikuar në portalin “Presheva.al”:
Në përmbajtjen e artikullit të këtij mediumi nuk paraqitet ndonjë fakt që mund të dëshmonte pretendimin për rezultatin, siç mund të jenë të dhëna nga Komisioni Qendror i Zgjedhjeve të Serbisë, apo ndonjë matje e ndonjë organizate (exit poll).
Kamberi ka interpretuar rezultatin e zgjedhjeve që duket se është në favor të kundërshtarëve.
“Kësaj here më duhet të them patjetër se jo ndoshta shteti serb por, citoj presidentin e ndjerë Ibrahim Rugova, janë dreqërit në radhët tona ata që e pamundësuan këtë përfaqësim. Gjashtë vota në Tërnocin gjithëshqiptar janë dhënë për SPS-in dhe 10 vota të tjera janë të pavlefshme, të cilat janë në funksion të Partisë Socialiste të Serbisë dhe Ivica Daçiqit. Mjerisht ndodhi kështu”, u shpreh Kamberi në intervistën dhënë për emisionin “Edicioni Special”, në Klan Kosova. (shih këtu)
Artikullin e “Presheva.al” me këtë pretendim e kanë publikuar edhe disa media online në gjuhën shqipe. (shih këtu, këtu dhe këtu).
Analiza:
Portali “Presheva.al” ka publikuar një artikull me pretendimin se Shaip Kamberi e ka fituar mandatit si deputet në Parlamentin e Serbisë, por këtë pretendim nuk e ka bazuar në asnjë fakt.
Në artikull nuk ka ndonjë të dhënë zyrtare qoftë nga Komisioni Qendror i Zgjedhjeve të Serbisë, apo ndonjë matje e ndonjë organizate (exit poll).
Mirëpo, këtë e ka hedhur poshtë vetë Kamberi gjatë një interviste në Klan Kosova, i cili ka interpretuar rezultatin e zgjedhjeve që duket se është në favor të kundërshtarëve, duke treguar se nuk ka arritur votat e mjaftueshme për të siguruar një ulëse në Kuvendin e Serbisë.
Bazuar në metodologjinë e punës, hibrid.info e vlerëson këtë artikull si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.