Portali i dyshimtë me përmbajtje në gjuhën shqipe “Banglarreporter” ka publikuar një artikull me titull “Gjenerali Amerikan: Eshte e nevojshme Qeverisja e Kurtit ne Kosove per te kontrolluar shtrirjen e Rusise ne Ballkan”.
Hibrid.info ka verifikuar faktet në këtë artikull, i cili rezulton të jetë i vjetër si dhe qëllimshëm i është vënë titull i rremë.
Në tekst gjendet lajmi i vitit 2017, atëkohë kur komandanti i ushtrisë amerikane në Evropë, gjenerali Curtis Scaparrotti gjatë debatit në Këshillin për forcat e armatosura në Senatin amerikan kishte thënë se është e nevojshme prania më e madhe e NATO-s në Kosovë për shkak të angazhimit të Rusisë në Ballkan.
Pra,lajmi nuk është aktual dhe nuk ka asgjë të vërtetë se Scaparrotti ka përmendur Qeverisjen Kurti siç pretendohet në titullin e këtij artikulli.
Vegëza e artikullit të publikuar në portalin e dyshimtë “Banglarreporter.com”:
I njëjti artikull me titull të rremë është shpërndarë edhe në Facebook nga faqja “Gazeta Aktive”, e cila në këtë postim ka arritur të grumbullojë reagime e komente të shumta. (shih këtu)
Pas hulumtimit përmes makinave të kërkimit, Hibrid.info ka arritur të gjejë artikullin e publikuar në kohë reale (23 mars 2017) nga portali “Lajmi.net”. (shih këtu)
Analiza:
Portali i dyshimtë “Banglarreporter.com” ka publikuar një artikull të vjetër të vitit 2017, të cilit qëllimshëm i ka vënë titull të rremë, duke u munduar ta paraqesë atë si aktual.
Pas analizës së kontrollit të fakteve bazuar në metodologjinë e punës, Hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.