Faqja në Facebook me emrin “Lajme Nga Bota” ka publikuar me 15 mars një postim me pretendimin se Turqia i ka dhënë donacion artileri të rëndë Kosovës, përfshirë këtu 5 ObusTanke M52T të modernizuara, me vendim të nënshkruar nga presidentët e dy shteteve.
Përkundër faktit se në postim thuhet që bëjnë të ditur mediat turke, gjatë kërkimeve të bëra nga hibrid.info, nuk është gjetur ndonjë lajm ndërlidhur me pretendimin e mësipërm.
Ky postim është shpërndarë edhe nga faqe e llogari të ndryshme në median sociale Facebook.
Vegëza e postimit të publikuar nga faqja me emrin “Lajme Nga Bota”:
Pretendimi i njëjtë është publikuar nga llogaritë dhe faqet si “Savash Veliu”, “Bota Sot E Re”, “KosovaLajm.net”, “Portali Alt” dhe “The Reis” në Facebook.
Llogaria “Lajme Nga Bota” pretendon se Kosovës i janë dhënë artileri e rëndë si donacion me vendim të nënshkruar nga presidentët e dy shteteve. Sipas postimit në fjalë, 5 ObusTanke M52T do të nisen në muajin maj dhe Kosova do të blejë edhe disa dronë Bayraktar TB-2, siç thuhet nga kjo faqe, “përcjellin mediat turke”.
Pasi kjo llogari i referohet mediave turke pa specifikuar emra, hibrid.info gjatë kërkimeve të bëra në media turke kredibile nuk ka gjetur ndonjë informacion për dhënie donacion të armëve të artilerisë së rëndë. (këtu, këtu)
Analiza:
Nuk ofrohen fakte kredibile për dhurimin si donacion të artilerisë së rëndë nga ana Turqisë për Kosovën, si dhe për marrëveshjen për blerjen e dronëve Bayraktar.
Bazuar në metodologjinë e punës, hibrid.info këtë pretendim e vlerëson si “përmbajtje e paverifikuar”.
Vlerësimi/përkufizimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.
