Shkroi: Fatbardh Dema
Portalet informative “Podujevasot.info” dhe “Llapi.info” kanë publikuar të mërkurën (5 nëntor) një artikull me titull “Digjet shtëpia e të moshuarve, vdesin 9 persona”.
Çka nuk shkon me këtë titull?
Pas verifikimit të fakteve, u vërtetua se titulli është përgjithësues.
Pse titulli konsiderohet përgjithësues është fakti se, meqë nuk përmendet vendi ku ka ndodhur ngjarja, i njëjti mund t’i bëjë lexuesit të mendojnë se tragjedia ka ndodhur në Kosovë. E e vërteta është se ngjarja, siç sqarohet në përmbajtje, ka ndodhur në Tuzlla të Bosnje e Hercegovinës.
Portalet e lartcekura, këtë artikull e kanë shpërndarë edhe në faqet e tyre zyrtare në Facebook.
Përmbajtja e publikuar në faqen “Podujeva Sot”, deri në shkrimin e këtij artikulli ka arritur të grumbullojë gjithsej 210 reagime, 49 komente dhe 2 shpërndarje. (shih këtu)
Ndërsa përmbajtja e publikuar në faqen “Llapi.info” në Facebook ka grumbulluar 56 reagime, 2 komente dhe 1 shpërndarje. (shih këtu)
Për ta vërtetuar edhe më shumë faktin se ngjarja ka ndodhur në Bosnjë, hibrid.info ka gjetur artikullin e publikuar nga mediumi në gjuhën boshnjake “Vijesti.ba”, i cili ka raportuar lidhur me këtë ngjarje. (shih këtu)
Analiza:
Portalet “Podujevasot.info” dhe “Llapi.info” kanë publikuar një artikull me titull “Digjet shtëpia e të moshuarve, vdesin 9 persona”, por pa specifikuar lokacionin ku ka ndodhur ngjarja.
Ky titull është i përgjithësuar dhe i paqartë, duke krijuar përshtypjen për lexuesit se tragjedia mund të ketë ndodhur në Kosovë, veçanërisht pasi portalet kanë audiencë lokale dhe emërton rajonin e Llapit.
Vetëm pas klikimit në artikull zbulohet se ngjarja ka ndodhur në Tuzlla, Bosnjë.
Bazuar në metodologjinë e punës, hibrid.info i vlerëson këta artikuj si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.