Portali “kosova-sot.info” ka publikuar një artikull me titull “Nga e hëna ndryshojnë masat, ministri i Shëndetësisë: 50 milionë vaksinime deri në qershor”.
Siç mund të shihet, titulli i këtij artikulli ka një përshkrim përgjithësues. Njëjtë ndodhë edhe me fotografinë ilustruese. Të dyja këto detaje nuk qartësojnë subjektin e lajmit, që në këtë rast është shteti i Italisë dhe institucionet e atij vendi.
Kjo ka bërë që lexuesit e këtij artikulli, që janë shumicë absolute nga Kosova, të futen në konfuzion.
Të ndikuar nga titulli, lexuesit e këtij portali shihet se kanë rënë pre e titullit, duke aluduar se vendimet për rritjen e masave e reja anti-covid dhe për vaksinimin e 50 milionë qytetarëve, janë të autoriteteve kosovare.
Teksti i artikullit të publikuar në “kosova-sot.info”:
Nga e hëna ndryshojnë masat, ministri i Shëndetësisë: 50 milionë vaksinime deri në qershor
Në Itali janë konfirmuar 23 mijë e 696 raste të reja me koronavirus në 24 orët e fundit. Ndërkohë, numri i viktimave është 460 vetëm për një ditë. Shqetësues është numri i personave që u shtruan në terapi intensive, 250 vetëm në 24 orë. Lombardia sheh një rritje të dukshme të rasteve, me më shumë se 5 mijë raste, ndërkohë që e ndjekin Emilja Romanja, Piemonte dhe Lacio. Ndërkohë, të hënën pritet që vendi të ndryshojë edhe një herë masat shtrënguese, në bazë të shifrave të javëve të fundit. Lacio mund t’i rikthehet disa masave më të lehta, dhe të rihapen shkollat fillore dhe kopshtet, ndërkohë që rajone si Lombardia dhe Emilia Romanja, Pulia dhe Friuli mbeten zona “të kuqe” të paktën deri më 12 prill. Sipas Ministrisë së Shëndetësisë, vendi do të fillojë tashmë fushatën masive të vaksinimit, sipas ministrit Speranza, priten 4.5 milionë vaksina deri në fund të marsit, dhe më shumë se 50 milionë të tilla në tremujorin e dytë të vitit.
Vegëza e artikullit të publikuar në “kosova-sot.info”:
Më poshtë mund të gjeni reagimet e lexuesve kosovarë, të cilët kanë rënë pre e këtij titulli përgjithësues.
Analiza:
Portali “kosova-sot.info” ka publikuar një artikull me lajm që ka të bëjë me shtetin e Italisë, pa e sqaruar në titull.
Ky titull ka ngjallur reagimin e lexuesve kosovarë, të cilët janë prirur të besojnë se lajmi ka të bëjë me Kosovën. Pas analizës së kontrollit të fakteve, hibrid.info e ka vlerësuar artikullin në fjalë si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
