Portali “Kosova-sot.info” ka publikuar artikullin me titull “Shteti synon heqjen e masave kufizuese kundër COVID-19”, ndërsa në fotografinë ilustruese ka vendosur një imazh në të vilën shihet një pjesë e rrugës Agim Ramadani në Prishtinë.
Me këtë fotografi të vendosur, ky portal ka lënë të kuptohet se lajmi për heqjen e masave kufizuese anti-Covid, ndërlidhet me Kosovën, pasi edhe në titull nuk qartësohet se për cilin shtet bëhet fjalë.
Por në fakt, lajmi ka të bëjë me Britaninë e Madhe, e cila në fund të muajit janar synon të largojë masat e fundit kufizuese derisa vala e infeksionit me Omicron po bie.
Duke ditur se portali “kosova-sot.info”, është i regjistruar në Kosovë dhe shumicën dërmuese të lexuesve i ka shqipfolës, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se heqja e masave kufizuese anti-Covid kanë të bëjnë me Kosovën.
Vegëza e artikullit të publikuar në “kosova-sot.info”:
https://www.kosova-sot.info/lajme/595013/shteti-synon-heqjen-e-masave-kufizuese-kunder-covid-19/
Hibrid.info ka arritur të gjejë këtë fotografi të publikuar më parë si ilustrim për ngjarje tjera që ndërlidhen me aktualitetet kosovare.
“Radiokosovaelire.com”, e ka përdorur atë fotografi ilustruese për lajmin për mbylljen e rrugës “Agim Ramadani për shkak të punimeve (19 nëntor 2020) (këtu), si dhe portali tjetër “epokaere.com”, për bllokimin e kësaj rruge (27 shtator 2021) për shkak të vizitës zyrtare të kryeministrit të Shqipërisë, Edi Rama (këtu).
Analiza:
Portali “kosova-sot.info” ka publikuar artikullin që ka të bëjë me Britaninë e Madhe, e cila pritet që në fund të muajit janar të heq masat anti-covid.
Por, në publikimin e këtij artikulli është vendosur fotografi tjetër, ajo e rrugës “Agim Ramadani” në Prishtinë dhe kjo mund t’i dezinformojë lexuesit, duke lënë të kuptohet se ky vendim ka të bëjë me shtetin e Kosovës.
Nga analiza e kontrollit të fakteve e kryer nga hibrid.info, ky artikull merr vlerësimin si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
