Portali informativ “Kosova-sot.info” ka publikuar dje (6 janar) një artikull me titull “Ekzek*utohet ish-ministri i njohur”.
Titulli i këtij artikulli nuk e bënë të qartë lajmin që paraqitet në përmbajtje. Gjithashtu ky titull nuk qartëson vendin apo shtetin e origjinës së lajmit.
Lajmi qartësohet vetëm në përmbajtje, ku shkruan se “Mediat britanike raportojnë se Kim Jong-un ka ekzekutuar një nga personat që ka pasur më pranë gjatë viteve të fundit, ish-ministrin e Jashtëm të shtetit komunist”.
Duke e ditur se ky portal informativ është i regjistruar në Kosovë (shih këtu) dhe shumicën e lexuesve i ka shqipfolës (shih këtu), një titull i tillë përgjithësues mund t’i dezinformojë lexuesit, duke i bërë të hamendësojnë se kjo ngjarje ka të bëjë me ndonjë ish-ministër të Kosovës.
Përveç titullit, lajmi nuk qartësohet as me anë të fotografisë, pasi në të shihet vetëm fjalia “LAJMI I FUNDIT”.
Vegëza e artikullit të publikuar në portalin “Kosova-sot.info”:
Pas hulumtimit të kryer përmes makinave online të kërkimit, hibrid.info ka arritur të gjejë artikullin e publikuar në mediumin britanik “The Sun”, të cilin e ka cituar portali informativ “Kosova-sot.info”. (shih këtu)
Analiza:
“Kosova-sot.info” ka publikuar një artikull lidhur me ekzekutimin e ish-ministrit të Koresë së Veriut, ndërsa në titull nuk sqarohet se ku ka ndodhur ngjarja.
Ky medium online është portal i cili vepron në Kosovë dhe që numrin dominues të lexuesve i ka nga Kosova, bazuar në përcjellësit e faqes në Facebook. Pra, mosdhënia e informacioneve për vendin e ngjarjes, shumë lehtë mund t’i dezinformojë lexuesit, duke i bërë të mendojnë se kjo ngjarje ka ndodhur në Kosovë.
Bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.