Shkroi: Etrit Rexhepi
Publikohet një artikull i titulluar “Elezi: Hera e parë që Beogradi do të kontrolloj nëntë komuna në Kosovë”.
Kjo përmbajtje është publikuar dje (14 tetor) në faqen zyrtare në Facebook të “Radio Televizionit 21”.
Cila është e vërteta?
Deklarata e njohësit të sigurisë, Bedri Elezi, nuk përkon me titullin e këtij artikulli.
Deri në momentin e trajtimit, ky publikim ka mbi 30 komente.
Në kreun e lajmit raportohet për deklaratën e Elezit, ku thuhet se, “Njohësi i sigurisë, Bedri Elezi në emisionin “Click” të RTV21 tha se është hera e parë që në një vend në botë, ku udhëhiqen nëntë komuna nga organizatat terroriste”.
Artikulli më tej vazhdon edhe me deklaratën e plotë të Elezit, që, edhe sipas verifikimit të Hibrid.info, del të jetë ndryshe ajo që është përfolur, pasi në citat ai nuk konkludon, por hamendëson.
Deklarata e Elezit e cituar në artikull, dhe e plotësuar nga Hibrid.info:
“Ndoshta është për herë të parë që në Kosovë që Beogradi zyrtar do të kontrollojë nëntë komuna që janë të udhëhequra nga organizata terroriste, Lista Sërpska, siç e ka konsideruar kryeministri i Republikës së Kosovës, duke marrë parasysh faktin që adresimi publik i presidentit, kryeministrit, kryetarit të Kuvendit, qeverisë, është qëndrim shtetëror, atë po i bie që është hera e parë që në një vend në botë udhëhiqen nëntë komuna nga organizata terroriste dhe Beogradi zyrtar, Vuçiq, ka hise në nëntë komuna”.
Titulli thekson deklaratën e Elezit mbi kontrollin e Beogradit në nëntë komuna në Kosovë, por që njohësi i sigurisë nuk e konstaton këtë, mirëpo lë hapësirë për pasaktësi, pasi thotë “ndoshta është për herë të parë…”.
Gjithashtu, Elezi këtë deklaratë e plotëson me deklarimet e krerëve shtetërorë, të cilët, sipas tij, e kanë konsideruar partinë e serbëve të Kosovës, Listën Serbe, si organizatë terroriste.
Analiza:
Titulli “Elezi: Hera e parë që Beogradi do të kontrolloj nëntë komuna në Kosovë” pasqyron vetëm pjesërisht deklaratën e njohësit të sigurisë, Bedri Elezi.
Në deklaratën e tij, Elezi ka thënë se “Beogradi zyrtar do të kontrollojë nëntë komuna që janë të udhëhequra nga organizata terroriste, Lista Sërpska, siç e ka konsideruar kryeministri i Republikës së Kosovës”, duke shtuar se “po i bie që është hera e parë që në një vend në botë udhëhiqen nëntë komuna nga organizata terroriste dhe Beogradi zyrtar, Vuçiq, ka hise në nëntë komuna”.
Pra, titulli thekson aspektin e kontrollit të Beogradit, por nuk përfshin dy pjesë thelbësore të deklaratës, që janë: hamendësimi i tij duke përdorur termin “ndoshta” dhe pretendimin se ky kontroll, sipas Elezit, realizohet përmes një organizate terroriste (Listës Serbe).
Andaj, bazuar në metodologjinë e punës, hibrid.info e vlerëson këtë përmbajtje si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.