Portali informativ “gazeta-shqip.com” ka publikuar dje (06 korrik) artikullin me titull “Nisma e re: Supermarketet do detyrohen me ligj të dhurojnë ushqimet e pashitura”.
Me verifikimin e fakteve të kryer nga hibrid.info, vërtetohet se titulli nuk e qartëson se për cilin vend vlen nisma e re e paralajmëruar për markete, çka e bën atë titull përgjithësues.
Pas klikimit të vegëzës së artikullit atëherë lajmi qartësohet në pjesën e përmbajtjes ku thuhet se: “Rajoni i Brukselit dëshiron të vendosë detyrime ligjore për supermarketet e mëdha që të dhurojnë ushqimet e pashitura”.
Nga kjo fjali e artikullit kuptohet se kemi të bëjmë me ligj për supermarketet, i cili do të vlejë për rajonin e Brukselit.
Vegëza e artikullit të publikuar në portalin “gazeta-shqip.com”:
Një tjetër arsye që e bën titullin përgjithësues është edhe adresa e portalit informativ në seksionin “TE DHENAT PERSONALE”e cila shfaqet të jetë në Tiranë. (shih këtu)
Andaj edhe çdo mos saktësim i vendit se ku ka ndodhur lajmi, le hapësirë për dezinformim se bëhet fjalë për ngjarje të ndodhur në Shqipëri.
Hibrid.info ka gjetur edhe artikullin origjinal nga transmetuesi ndërkombëtar, Deutsche Welle (DW), prej të cilit është marrë artikulli, ku flitet për ligjin për dhurimin e ushqimeve të pashitura nga marketet (shih këtu).
Analiza:
Pas verifikimit e fakteve, hibrid.info ka vërtetuar se mediumi “Gazeta Shqip” ka publikuar një artikull lidhur me një ligj për të cilin pritet t’i detyrojë marketet në rajonin e Brukselit, që t’i dhurojnë ushqimet e pashitura. Por në titulli nuk e sqaron se për cilin vend bën fjalë lajmi.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.