Portali me përmbajtje në gjuhën shqipe “Sot.com.al” ka publikuar sot (8 mars) një artikull me titull “Kontroll në banesën e 65-vjeçares, policia befasohet nga ajo çfarë gjen”.
Përpos titullit përgjithësues që nuk sqaron se në cilin vend ka ndodhur ngjarja, në këtë artikull shihet që edhe fotografia ilustruese nuk i përgjigjet përmbajtjes.
Lajmi qartësohet vetëm në përmbajtje, ku bëhet e ditur se “Policia e Berlinit është befasuar nga ajo çfarë gjeti pas kontrolleve në shtëpinë e terroristes së arrestuar të RAF, Daniela Klette. Mësohet se gjatë operacionit u gjetën në banesë arsenal armësh dhe ar”.
Mirëpo, në fotografinë e vendosur në këtë artikull, shihet një veturë e Policisë së Kosovës. Kjo lë vend për keqkuptim te lexuesit, duke i bërë të mendojnë se ngjarja ka ndodhur diku në Kosovë.
Vegëza e artikullit të publikuar në portalin “Sot.com.al”:
Fotografia ilustruese e vendosur nga ky portal, në fakt është përdorur nga disa mediume në vend kur është raportuar për ndonjë aksion të ndërmarrë nga Policia e Kosovës (shih këtu, këtu dhe këtu), ndërsa artikulli i “Sot.com.al” është lidhur me një ngjarje në Berlin, çka dëshmon faktin se nuk ka të bëjë me aksion nga Policia e Kosovës për t’u përdorur si ilustrim.
Për ta vërtetuar edhe më shumë faktin se vetura që shihet në fotografi i takon Policisë së Kosovës, hibrid.info ka arritur të gjejë një publikim që tregon se këto vetura të tipit “Skoda” janë në dispoziocion të këtij institucioni që nga viti 2016. (shih këtu)
Për ta vërtetuar edhe më tej faktin se ngjarja ka ndodhur në Berlin të Gjermanisë, hibrid.info ka gjetur artikullin e publikuar nga medium gjerman “Deutsche Welle”, që ka raportuar lidhur me këtë ngjarje. (shih këtu)
Analiza:
Në titullin e artikullit të publikuar nga “Sot.com.al” nuk sqarohet se në cilin shtet ka ndodhur kjo ngjarje, ndërsa lajmi qartësohet vetëm në përmbajtje, ku bëhet e ditur se kjo ka ndodhur në kryeqytetin e Gjermanisë, Berlin.
Përveç titullit përgjithësues, artikulli përmban edhe fotografi që nuk përkon me përmbajtjen, kjo pasi në të shfaqet një veturë e Policisë së Kosovës, që lë të kuptohet se ngjarja ka ndodhur në ndonjë vend në Kosovë.
Bazuar në metodologjinë e punës, hibrid.info këtë artikull e vlerëson si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.