Faqja në Facebook me përmbajtje në gjuhën shqipe “Live News” ka publikuar sot (13 mars) një artikull me titull “Shi, breshër dhe stuhi, ja si do të jetë moti për sot dhe nesër në…”.
Pas verifikimit të fakteve, hibrid.info ka vërtetuar se artikulli ka të bëjë me parashikimin e motit në Shqipëri dhe se i njëjti është i vjetër.
Pra, faqja “Live News” ka publikuar artikullin për parashikimin e motit të datës 3 nëntor, të cilin e ka paraqitur si aktual.
Vegëza e artikullit të publikuar nga “Live News” në Facebook:
Pas hulumtimit të kryer përmes makinave online të kërkimit, ka gjetur se artikulli për parashikimin e motit është publikuar nga Shërbimi Meteorologjik Ushtarak në Shqipëri me datë 3 nëntor 2023. (shih këtu)
Për ta vërtetuar edhe më tej faktin se parashikimi për motin, i publikuar nga faqja “Live News” është i vjetër, hibrid.info ka gjetur të publikuar në faqen “Sherbimi Meteorologjik Ushtarak” me datë 13 mars parashikimin e motit për në Shqipëri, ku shihet se nuk ka paralajmërim për breshër e stuhi. (shih këtu)
Kjo nuk është hera e parë që ky artikull i vjetër paraqitet si aktual, i njëjti është publikuar edhe gjatë muajit janar. (shih këtu)
Analiza:
Një faqe në Facebook ka publikuar parashikimin e motit për territorin e Shqipërisë, të datës 3 nëntor, të cilin e ka publikuar si aktual, duke paralajmëruar se sot dhe nesër pritet të ketë shi, breshër e stuhi.
Ky artikull është shpërndarë edhe gjatë muajit janar nga po e njëjta faqe, që gjithashtu është trajtuar nga hibrid.info.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
