Një nga portalet e dyshimta “GazetaProgresi.com” ka publikuar një artikull duke pretenduar se Aleksandar Vuçiq i kërkon Richard Grenellit shuarjen e ushtrisë së Kosovës.
Me të hapur artikull, i cili është postuar në Facebook, vërehet se teksta në brendësi të artikullit paraqet krejtësisht diçka tjetër. Në fakt, përmbajtja e këtij artikulli përshkruan cicërimën e Grenell-it, përmes së cilës paraqet përjetimet gjatë një darke në një restorant në Beograd, së bashku me krerët e shtetit të Serbisë dhe pjesës tjetër të delegacionit amerikan.
Teksti i artikullit të publikuar në GazetaProgresi.com:
Vuçiqi i kerkon vëtem këte gjë Grenellit: Shuarjen e Ushtrisë së Kosovës
Takimi i Grenellit me Vuçiqin, ja për çka biseduan Vuçiqi i kerkon vëtem këte gjë Grenellit: Shuarjen e Ushtrisë së Kosovës
I dërguari i presidentit amerikan, Donald Trump për dialogun Kosovë-Serbi, Richard Grenell e ka quajtur të mahnitshme mbrëmjen që e ka kaluar në Beograd. Grenell në darkë ka qenë me presidentin e Serbisë, Aleksandar Vuçiq, kryeminstren Ana Bërnabiq dhe anëtarët e delegacionit serb dhe amerikan, teksa në Twitter e ka ndarë videon e kësaj mbrëmjeje.
“Serbët dhe amerikanët në Beograd këndojnë dhe Vir ginian Perëndimore, natë e mahnitshme”, ka shkruar Grenell, teksa ka postuar videon me kerkesen e Vuçiqit shum te rënd per Grenellin
Vegëza e artikullit të botuar në GazetaProgresi.com:
Siç mund të vërehet, përmbajtja e artikullit është marr nga raportimet e mediave rreth cicërimës së Grenellit, ku përmes një video të bashkangjitur, ky zyrtar amerikan e ka përshkruar atmosferën në atë darkë. Në bazë të hulumtimit, shihet se titull (kërkesa për shuarje të ushtrisë së Kosovës) nuk përputhet, as për së afërmi, me asnjë deklarim të vet Grenell-it apo Vuçiq-it.
‘Cicërima’ e Grenellit në Twitter:
Analizë:
Pas verifikimit nga hibrid.info, as Grenell dhe as Vuçiq nuk kanë deklaruar diçka lidhur me shuarjen e ushtrisë së Kosovës. Si rrjedhojë, ky artikull i GazetaProgresi.com kategorizohet si “Dezinformatë”, “Clickbait” dhe “Lajm i rremë”.
Arsyetimi:
Dezinformata
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
Clickbait
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
Lajm i rremë
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
