Artikull nga ShareAmerica
Për vite me radhë, mediat ruse të financuara dhe të drejtuara nga shteti kanë promovuar tregime të rreme dhe provokuese për Ukrainën (shih këtu). Këtë e bëjnë për të rritur ndikimin në opinion. E portretizojnë qeverinë e Ukrainës si një nxitës të dhunës, madje edhe kundër civilëve të saj.
Në prill 2021, një media ruse raportoi se një djalë i ri u vra në rajonin lindor të Donbasit nga një dron i forcave të armatosura ukrainase. Familja e djalit nuk e konfirmoi ngjarjen. Asnjë organizatë zyrtare e besueshme, si Organizata për Siguri dhe Bashkëpunim në Evropë (OSBE), anëtare e së cilës është Rusia, nuk e konfirmoi as këtë raport.
OSBE dhe media e pavarur publikuan raporte të mëvonshme që zbuluan se djali kishte vdekur në rajon, por jo nga një sulm me dron ose për shkak të ndonjë veprimi që përfshin forcat e armatosura ukrainase. Megjithatë, mediat në Evropë, të financuara nga Kremlini, vazhduan të raportojnë sulmin me dron si shkakun e vdekjes së djalit. Një media e përshkroi atë si një “akt terrorizmi”.
Kjo histori e rreme ndjek vazhdën e dezinformimit të Rusisë. Mësoni më shumë rreth këtij dhe shembujve të tjerë të dezinformatave të financuara nga Kremlini në një raport të ri (shih këtu) nga Qendra Globale e Angazhimit të Departamentit të Shtetit.
(ShareAmerica është platforma e Departamentit të Shtetit të SHBA-së për komunikimin e politikës së jashtme amerikane në mbarë botën. Në këtë platformë publikohen e shpërndahen artikuj, ngjarje, tregime dhe imazhe bindëse që ndezin diskutime dhe debate mbi tema të rëndësishme si liria fetare, sundimi i ligjit, prosperiteti ekonomik, dinjiteti njerëzor dhe sovraniteti).