Disa faqe në Facebook kanë publikuar një fotografi në të cilën shihet drejtuesi i shoqatës bamirëse, Halil Kastrati së bashku me një të moshuar.
Në përshkrimin e kësaj fotografie, këto faqe në Facebook kanë pretenduar se gruaja që shihet në këtë imazh është e moshuara që u sulmua fizikisht nga një infermiere në shtëpinë e pleqve në Pejë “Orenda” (2 nwntor).
Në këtë përshkrim pretendohet se Kastrati tashmë e ka strehuar të moshuarën në shtëpinë e pleqve “Jetimat e Ballkanit”.
Mirëpo, pas verifikimit të fakteve të kryer nga hibrid.info, është vërtetuar se kjo fotografi është e vjetër (21 tetor 2021) dhe se e moshuara që shihet në të nuk është e personi i sulmuar nga infermierja.
Disa nga faqet e shumta që publikuan këtë fotografi të vjetër, me pretendimin ta paraqesin si aktuale duke e ndërlidhur atë me rastin e të sulmuarës janë: “Dukagjini News”, “Gazeta Prishtina”, “Prishtina ShowBiz”, “Dardania Lajme”, “Mekuli Press” dhe “Gazeta Shqip”.
Pas hulumtimit të bërë përmes programit te automatizuar online për kontroll faktesh – “InVID”, hibrid.info ka arritur të gjejë fotografinë autentike të publikuar në llogarinë personale të Halil Kastratit në rrjetin social “Instagram”, e cila është realizuar më 21 tetor 2021. (shih këtu fotografinë e dytë me radhë)
Këto faqe në Facebook këtë publikim të kësaj fotografie me përshkrim të sajuar, rezulton ta kenë bërë pas reagimit të bërë nga vetë Halil Kastrati, i cili dje (2 nëntor) në llogarinë e tij zyrtare në Facebook ka shprehur gatishmërinë që të moshuarën ta strehojë në shtëpinë e pleqve të cilën e ka ndërtuar organizata bamirëse “Jetimat e Ballkanit” me ndihmën e donatorëve. (shih këtu)
Analiza:
Disa faqe në Facebook kanë publikuar një fotografi të vjetër të muajit teteor 2021, në të cilën shihet drejtuesi i shoqatës bamirëse, Halil Kastrati së bashku me një të moshuar.
Në përshkrimin e kësaj fotografie këto faqe kanë pretenduar rrejshëm se e moshuara që shihet në këtë imazh është e moshuara që u sulmua fizikisht nga një infermiere në shtëpinë e pleqve në Pejë “Orenda”, duke shtuar se Kastrati tashmë e ka strehuar atë në shtëpinë e pleqve “Jetimat e Ballkanit”.
Bazuar në metodologjinë e punës, hibrid.info i vlerëson këtë postim të këtyre faqeve si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.