Portali informativ “Kosova-sot.info” ka publikuar sot (12 shtator) një artikull me titull “Ja pse u vendos që vetëm gjyqtarët francez ta drejtojnë ndeshjen Rumani – Kosovë”.
Pas verifikimit të fakteve të kryer nga hibrid.info, është vërtetuar se titulli nuk i përgjigjet përmbajtjes.
Me anë të titullit mundohet të paraqitet se ka një arsye se shtëpia evropiane e futbollit (UEFA) ka vendosur që vetëm gjyqtarë francezë të ndajnë drejtësinë e ndeshjes Rumani – Kosovë, e cila pritet të zhvillohet sot me fillim nga ora 20:45.
Megjithatë, në përmbajtje bëhet e ditur se UEFA ka vendosur që gjyqtarët francezë të ndajnë drejtësinë në këtë takim, por nuk është dhënë ndonjë arsye se pse është marr ky vendim, siç mundohet të paraqitet përmes titullit.
Vegëza e artikullit të publikuar në portalin “Kosova-sot.info”:
Në ueb-faqen zyrtare të UEFA-s bëhet e ditur se gjyqtarët francezë pritet të ndajnë drejtësinë në këtë ndeshje, pa dhënë informata në lidhje më këtë vendim. (shih këtu)
Analiza:
Pas verifikimit të fakteve të kryer nga hibrid.info, është vërtetuar se “Kosova-sot.info” ka vënë titull të sajuar duke lënë të kuptohet se ka një arsye se pse UEFA ka vendosur gjyqtarë francez në ndeshjen ndërmjet Rumanisë dhe Kosovës.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.