Portali informativ “Reporteri.net” ka publikuar sot (3 tetor) një artikull me titull “Gjermania thotë se Vuçiqit nuk mund t’i besohet”.
Hibrid.info pas verifikimit të fakteve të paraqitura në përmbajtje, ka vërtetuar se titulli nuk sqaron se bëhet fjalë për mediat gjermane dhe jo qëndrim zyrtar të shtetit të Gjermanisë.
Lajmi qartësohet në përmbajtje, më saktësisht në kreun e lajmit, kur thuhet se ““Serbët po marshojnë në Kosovë?”, “Putini po nxit luftën e ardhshme ballkanike?”, “Lojë serbe”… Këto janë vetëm disa nga titujt e shtypit gjerman për gjendjen në Kosovë dhe Serbi”.
Titulli përgjithësues i artikullit lë vend për keqinformim te lexuesit duke lënë hapësirë të nënkuptohet se bëhet fjalë për qëndrim zyrtar të shtetit të Gjermanisë.
Vegëza e artikullit të publikuar në “Reporteri.net”:
Hibrid.info ka gjetur artikullin autentik të publikuar në Deutsche Welle (DW) në gjuhën shqipe, i cili mbanë titullin “Vuçiqit nuk mund t’i besohet” me një përshkrimin në postimin në faqen e tyre në Facebook, “Mediat gjermane kritikojnë ashpër Vuçiqin, Gjermania e gatshme të shtojë trupat në Kosovë”. (këtu, këtu)
Analiza:
Portali informativ “Reporteri.net” ka publikuar një artikull me titull përgjithësues “Gjermania thotë se Vuçiqit nuk mund t’i besohet”, duke lënë të nënkuptohet se bëhet fjalë për qëndrim zyrtar të shtetit gjerman, ndërsa lajmi qartësohet në përmbajtje duke sqaruar së bëhet fjalë për mediat gjermane.
Bazuar në metodologjinë e punës, hibrid.info këtë pretendim e vlerëson si “clickbait”.
Vlerësimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.