Faqja në Facebook me përmbajtje në gjuhën shqipe “Support for Erdogan from Presheva”, ka publikuar dje (22 tetor) një video-material me pretendimin se Izraeli po arreston dhe kufizon të krishterët në Jerusalem.
Gjithashtu, faqja e lartcekur pretendon se video-materiali është realizuar me datë 21 tetor të këtij viti.
Pas verifikimit të fakteve të kryer nga hibrid.info, është vërtetuar se pamjet janë të vjetra.
Vegëza e video-materialit të publikuar në Facebook nga faqja “Support for Erdogan from Presheva”:
https://www.facebook.com/watch/?v=311168271543654
Mbishkrimi origjinal i video-materialit të publikuar nga “Support for Erdogan from Presheva”:
IZRAELI TERRORIST PO ARRESTON DHE KUFIZON KRISHTERËT NË JERUSALEM
Regjistrimi i djeshëm.
Autoritetet izraelite kanë kufizuar qasjen për mijëra të krishterë në Tempullin e Sepulchre të Shenjtë në Jeruzalem.
Pas hulumtimit të kryer përmes programit të automatizuar “InVID”, hibrid.info ka arritur të gjejë video-materialin e njëjtë të publikuar në median sociale “Reddit” me datë 15 prill 2023. (shih këtu)
Përshkrimi i video-materialit të publikuar në Reddit, i përkthyer në shqip:
Një tjetër pamje video që dokumenton momentin kur forcat izraelite sulmojnë brutalisht palestinezët e krishterë që festonin të Shtunën e Shenjtë në qytetin e vjetër të Jeruzalemit të pushtuar.
Analiza:
Faqja “Support for Erdogan from Presheva” ka publikuar një video-material të vjetër, duke pretenduar rrejshëm se i njëjti është realizuar në tetor të këtij viti.
Bazuar në metodologjinë e punës, hibrid.info e vlerëson këtë postim si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.