Artikulli me titull “Masat e reja kundër Covid, ja kush janë kategoritë që nga sot nuk lejohen pa certifikatë vaksinimi në punë”, është publikuar nga portali “arbresh.info”.
Pas kontrollit të fakteve të kryer nga Hibrid.info, është vërtetuar se titulli i këtij artikulli është përgjithësues i cili lë hapësirë për keqinformim, pasi në të nuk bëhet e qartë se në cilin shtet janë ndërmarrë këto masa.
Me të hyrë brenda në artikull, kuptohet se në fakt masat e reja anti-Covid kanë të bëjnë me Shqipërinë.
Duke ditur se portali “arbresh.info” është i regjistruar në Kosovë dhe se shumicën dërmuese të lexuesve i ka kosovarë, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se këto masa të reja kanë të bëjnë me Kosovën.
Pjesë nga artikulli i publikuar në “Arbresh.info”:
Masat e reja kundër Covid, ja kush janë kategoritë që nga sot nuk lejohen pa certifikatë vaksinimi në punë
Sot në Shqipëri do të hyjnë në fuqi masat e reja të vendosura në kuadër të pandemisë dhe rrezikut nga varianti Omicron
Në mbledhjen e fundit, Komiteti Teknik njoftoi se nga data 4 janar punonjësit e administratë publike, të qendrave tregtare dhe supermarketeve , do të duhet të dorëzojnë certifikatën e vaksinimit për t’u paraqitur në punë.
Në mungesë të certifikatës, ata që nuk duan të vaksinohen, do të duhet të bëjnë test PCR çdo 5 ditë.
Vegëza e artikullit të publikuar në “Arbresh.info”:
Analiza:
Portali “Arbresh.info” ka publikuar një artikull që ka të bëjë me masat e reja anti-Covid në Shqipëri, ndërsa në titull nuk bëhet e qartë se për cilin shtet bëhet fjalë.
Duke qenë se ky portal është i regjistruar si entitet në Kosovë dhe shumica e audiencës janë kosovarë, bënë që ky artikull të kuptohet nga audienca si lajm që ndërlidhet me Kosovën, duke lënë mundësi keqinformimi.
Pas kontrollit të fakteve bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
