Shkroi: Fatbardh Dema
Faqja “The Reis” në Facebook me përmbajtje në gjuhën shqipe, ka publikuar dje (15 prill) një video-material në të cilën paraqitet një grumbull njerëzish në ambientet e një aeroporti.
Kjo faqe pretendon se pamjet paraqesin izraelitët me shtetësi të dyfishtë, të cilët po largohen nga Izraeli nga frika se lufta do të përshkallëzohet.
Bazuar në përmbajtjen e ditëve të fundit të kësaj faqe, shihet se ajo publikon materiale për sulmin e Iranit ndaj Izraelit me 13 prill. (këtu)
Pas verifikimit të fakteve të kryer nga hibrid.info, është vërtetuar se pamjet nuk janë aktuale dhe se të njëjtat janë realizuar në muajin tetor 2023, atëkohë kur nisi konflikti Hamas – Izrael.
Vegëza e postimit të publikuar në Facebook nga faqja “The Reis”:
https://www.facebook.com/watch/?v=3525438137721747
Përshkimi i postimit të publikuar në faqen “The Reis”:
Aeroportet izraelite janë mbushur plot.
Izraelitët me shtetësi të dyfishtë po largohen nga Izraeli, duke menduar se lufta do të përshkallëzohet.
Izraelitët, shumica e të cilëve vijnë nga SHBA, Australia apo vendet e BE-së, kthehen në vendet nga kanë ardhur.
Pas hulumtimit të kryer përmes programit të automatizuar “InVID”, hibrid.info ka arritur të gjejë pamjet e njëjta që shfaqin izraelitët duke u larguar nga Izraeli, e që video është realizuar në muajin tetor 2023. (shih këtu dhe këtu)
Analiza:
Pas verifikimit të fakteve, hibrid.info ka vërtetuar se faqja “The Reis” ka publikuar një video-material të muajit tetor 2023, të cilin është munduar ta paraqesë si aktual, duke pretenduar rrejshëm se pamjet paraqesin izraelitët duke u larguar nga Izraeli, siç thuhet në mbishkrim “nga frika se lufta do të përshkallëzohet”.
Bazuar në metodologjinë e punës, hibrid.info e vlerëson këtë pretendim si “Përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.