Shkroi: Fatbardh Dema
Raportimi në disa media online në Kosovë më 28 dhe 29 prill për një vrasje të ndodhur në Duseldorf të Gjermanisë, ku dyshohet se të përfshirë ishin një shqiptar i Kosovës (i dyshuari për vrasje) dhe një person me nënshtetësi serbe (viktima e dyshuar), kanë publikuar të dhëna të paverifikuara për ngjarjen.
Këta artikuj u publikuan nga portalet “Indeksonline.net”, “Botasot.info” dhe “Epokaere.com”.
Çka raportuan këto portale?
Në artikujt e tyre, portalet në fjalë vendosën një fotografi dhe të dhëna të një personi me anë të së cilave pretendohej se ai është viktima dhe se i njëjti quhet Aleksandar Stefanovic.
Vegëzat e artikullit të publikuar në portalet “Indeksonline.net”, “Epokaere.com” dhe “Botasot.info”:
https://archive.is/TMs31#selection-1203.0-1203.109
Çka gjeti Hibrid.info?
Pas hulumtimit të kryer përmes makinave online të kërkimit, Hibrid.info ka arritur të konstatojë se personi i apostrofuar nuk është viktima. Kjo pasi platforma jonë ka arritur të gjejë një video-material të publikuar nga Aleksandar Stefanovic, ku ai demanton raportimet.
Ai përmes llogarisë së tij personale në Facebook, ka sqaruar se është gjallë dhe se bëhet fjalë për një person tjetër që mbeti i vrarë, mik i tij, me emrin Aleksandar. (shih këtu)
Çka u raportua në mediat gjermane?
Në mediumin gjerman “Welt.de” sqarohet se personi i vrarë njihej si reper me nofkën “AleksM”. (shih këtu)
“Sipas gjetjeve të deritanishme, në restorant ka pasur një mosmarrëveshje të dielën mbrëma mes të dyshuarit dhe viktimës, i cili sipas informacioneve të WELT njihet edhe si reperi ‘Aleks M’. Në mesin e viteve 2010 ai publikoi këngë së bashku me të mëdhenjtë gjermanë të repit si Kollegah dhe Sun Diego”, shkruan Welt.de.
Analiza:
Disa portale online në Kosovë kanë raportuar për një vrasje të ndodhur ditë më parë në Gjermani, por që në artikuj kanë vendosur të dhëna të një personi tjetër, me pretendimin se ai është personi që humbi jetën.
Bazuar në metodologjinë e punës, hibrid.info i vlerëson këta artikuj si “Përmbajtje e pavarifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.