Shkroi: Etrit Rexhepi
Është publikuar një artikull, në titullin e të cilit pretendohet se gazetari Milaim Zeka e ka vlerësuar një politikane si, ‘Spiune e Kosovës te Vuçiç’.
Artikulli është publikuar dje (23 maj) në portalin e televizionit “ntv.al”.
Cila është e vërteta?
Hibrid.info ka gjetur se ish-deputeti i Kuvendit të Kosovës, Zeka, nuk ka e cilësuar asnjë politikan apo politikane, me epitetin që pretendohet.
Vegëza e artikullit të publikuar në portalin “ntv.al”:
Artikulli me përmbajtjen e njëjtë është publikuar në portalin “top-channel.tv”, me titull “’Kjo politikane natën rri me Kurtin dhe gjithë ditën…’ Milaim Zeka: Përdor strategjinë e Vuçiçit” (shih këtu).
Deklaratat janë shkëputur nga një intervistë e gazetarit për televizionin “Top News” (shih këtu).
Hibrid.info ka verifikuar përmbajtjen e këtij artikulli dhe ka gjetur se në asnjë rresht, Milaim Zeka nuk i referohet askujt me epitetin “spiun”.
Kreu i lajmit nis me fjalinë, “Gazetari Milaim Zeka dha emrin e një politikaneje në Kosovë që sipas tij vepron njësoj si Vuçiç”.
Deklaratat e Zekës të nxjerra nga artikulli:
“Me perëndimin jemi katandisur në këtë gjendje saqë Donika Gërvalla, ministre e një vendi që nuk prodhon as domate, as kastraveca, ministre e një vendi që nuk paraqet në mënyrë absolute kurrfarë rëndësie për Bashkimin Evropian dhe Shtetet e Bashkuara të Amerikës, gjen kohën për t’u tallur dhe për të thënë që po, ne e dorëzojmë draftin, në kohën kur ajo e dinte fare mirë që Albin Kurti nuk dorëzon draft, Albin Kurti nuk e krijon Asociacionin
Madje e shpikën këtë teorinë e konfrontimit gjasmë mes Gërvallës dhe presidentes Vjosa Osmani. Presidentja ngjason shumë me Vuçiçin në një pikë. Vuçiçi po përdor një strategji mes lindjes dhe perëndimit. Gjithë ditën është me perëndimin, e gjithë natën është me Putinin. Të njëjtën gjë po e bën dhe Vjosa Osmani: Gjithë ditën është me perëndimorët e gjithë natën është me Albinin dhe me Donika Gërvallën”
Në bazë të asaj që tregohet në krye dhe nga deklaratat që është ndërtuar artikulli, kuptohet që Zeka, ka kritikuar punën e ministres së Punëve të Jashtme, Donika Gërvalla dhe ka krahasuar qasjen e presidentes Vjosa Osmani me atë të presidentit serb Aleksandër Vuçiq, por që në asnjë moment nuk e ka shprehur vlerësimin, të cilin pretendohet për këto figura politike.
Analiza:
Pretendimi se gazetari Milazim Zeka e ka vlerësuar një politikane si “spiune të Vuçiqit në Kosovë”, nuk është i vërtetë.
Zeka ka dhënë komente për punën e ministres Donika Gërvalla dhe ka krahasuar qasjen e presidentes Vjosa Osmani me atë të presidentit serb Aleksandër Vuçiq.
Bazuar në metodologjinë e punës, hibrid.info e ka vlerësuar këtë përmbajtje si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.