Portali i dyshimtë “Specialja.com” ka publikuar dje (6 tetor) një artikull me titull “Richard Grenell:Vizat të hiqen ditën e dielë nëse arrihet kjo marrëveshje?”.
Lajmi i publikuar nga ky portal, nuk i përshtatet kontekstit kohorë, meqenëse deklarata e ambasadorit Richard Grenell për liberalizim të vizave të Kosovës me BE-në, është bërë me 8 korrik, në rrethana tjera politike.
Teksti origjinal i publikuar në Specialja.com:
Richard Grenell:Vizat të hiqen ditën e dielën nëse arrihet kjo marrëveshje?
Richard Grenell: Vizat mund të hiqen ditën e dielë. Ishin 42 deputetë europianë, që javë më parë me anë të një letre, kërkuan heqjen e vizave për kosovarët.
Ndërkohë, për emisarin e SHBA-ve në dialogun Kosovë-Serbi, Richard Grenell, diçka e tillë pritet të ndodh nga Samiti online i Parisit, që mbahet këtë fundjavë. / Hap marketingun 5 sekonda dhe shfaqen pamjet ekskluzive
Vegëza e artikullit të botuar në Specialja.com:
Ky lajm është i vjetër dhe i takon datës 8 korrik të këtij viti. I dërguari special i Shtëpisë së Bardhë për dialogun Kosovë – Serbi, Grenell, këtë deklaratë e dha për Klan Kosova pak para samitit të Parisit (korrik 2020).
Analiza:
Artikulli i publikuar në Specialja.com është i vjetër. Portale tjera të ngjashme që pretendojnë të paraqiten si media online, jo rrallë herë marrin artikuj të vjetër dhe i publikojnë ata përsëri në mënyrë që të tërheqin lexues. Ky artikull kategorizohet si “Clickbait”.
Arsyetimi:
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.