“Hapet Ura e Ibrit” është mbishkrimi i vendosur në ballinën e një videoje të publikuar nga kanali “NTV Televizion” në YouTube.
Videoja u publikua dje (11 shtator).
Çka nuk shkon me këtë mbishkrim?
Pretendimi i cekur në ballinën e videos nuk qëndron. Ura kryesore mbi lumin Ibër në Mitrovicë nuk është hapur dhe nuk ka vendim zyrtar për hapjen e saj.
Vegëza e video-materialit:
Në ballinën e videos është e vendosur edhe një fotografi e presidentes Vjosa Osmani.
Video-materiali përmban kronika televizive me lajme dhe ngjarje që lidhen me Kosovën. Aty përmbajtja e parë, që mban titullin “HAPJA E URES SE IBRIT”, nuk paraqet asnjë njoftim i cili tregon se është marrë vendim për hapjen e urës në fjalë. (shih fotografinë më poshtë)
Hibrid.info ka vërtetuar se përmbajtja që dëgjohet në kronikën e parë të videos me titull: “Kosova | Lajmet më të fundit – NTV” është marrë nga një artikull i mediumit “albanianpost.com” me titull: “BE-ja e demanton Osmanin: Ne ende insistojmë që hapja e urës të diskutohet në dialog”.
Për dallim nga shkrimi i portalit, në audio janë hequr burimet.
Pra artikulli nuk thotë se ura është hapur, por bëhet fjalë për qëndrimin e Bashkimit Evropian që për hapjen e urës të diskutohet në dialog.
Hibrid.info ka kryer një hulumtim edhe përmes motorit të kërkimit “Google”, duke përdorur fjalët kyçe “hapet ura e ibrit”. Sipas rezultateve të këtij kërkimi, nuk është gjetur asnjë konfirmim se vendimi për hapjen e urës është marrë (shih këtu).
Kontekst:
Më 8 gusht nisi testimi i sigurisë statike të Urës mbi Ibër pasi Qeveria njoftoi për planin për hapjen e saj. Serbët lokalë protestuan e bashkësia ndërkombëtare kërkoi hapjen e saj pas marrëveshjes në dialog. Forcat e KFOR-it vazhdojnë të patrullojnë mbi urë.
Se ura nuk është hapur shihet edhe në videon e publikuar nga kryeministri Albin Kurti më 10 shtator në Facebook. Aty vërehen forcat e KFOR-it mbi urë dhe bllokadat që ndalojnë qarkullimin e veturave (Video: 03:14)
Nuk është hera e parë që ky kanal në YouTube përdor ballina të tilla të videove. Hibrid.info ka trajtuar një rast të tillë edhe në fund të muajit gusht (shih këtu).
Analiza:
Pretendimi se është marrë vendimi për hapjen e Urës së Ibrit është i pasaktë.
Videoja që në ballinë mban shkrimin “Hapet Ura e Ibrit” nuk ka të përfshirë njoftim zyrtar për hapjen e urës.
Edhe një kërkim në Google me fjalët “hapet ura e Ibrit” nuk gjeti asnjë artikull që do ta konfirmonte një vendim të tillë.
Andaj, bazuar në metodologjinë e punës, hibrid.info e vlerëson këtë përmbajtje si “Dezinformatë” dhe “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
