Shkroi: Fatbardh Dema
U publikua një sondazh në formë postimi për disa nga subjektet politike në Kosovë, me pretendimin se i njëjti u krye nga kompania amerikane Cygal.
Postimi u publikua dje (13 tetor) në TikTok nga llogaria “politik.shqip”.
Në këtë sondazh, Lëvizja Vetëvendosje paraqitet me 37%, Partia Demokratike e Kosovës (34%), Lidhja Demokratike e Kosovës (24%) dhe Aleanca për Ardhmërinë e Kosovës – NISMA (4%).
Çka gjeti hibrid.info?
Pas hulumtimit të kryer online nga hibrid.info, ky sondazh nuk është gjetur i publikuar nga asnjë burim kredibil. Po ashtu, nuk ka asnjë kompani amerikane me emrin “Cygal” që merret me sondazhe.
Hibrid.info ka hulumtuar përmes makinës online të kërkimit “Google”, në lidhje me këtë “sondazh”, siç pretendohet të jetë kryer nga kompania amerikane “Cygal”.
Pas kërkimit, rezultatet nuk shfaqin asnjë kompani me emrin “Cygal”, e që e njëjta të ketë kryer sondazh për zgjedhjet në Kosovë. (shih këtu)
Gjithashtu, hibrid.info ka kërkuar edhe me fjalët kyçe (VV 37%, PDK 34%, LDK 24%, AAK – NISMA 4%), e që rezultatet nuk shfaqin asnjë sondazh me këto të dhëna. (shih këtu)
Trajtimi i kësaj përmbajtje u bë me arsyen se e njëjta deri në shkrimin e këtij artikulli ka arritur të grumbullojë mbi 20 mijë shikime dhe 183 komente.
Analiza:
U publikua një fotografi me të dhëna në përqindje për disa subjekte politike për zgjedhjet në Kosovë me pretendimin se ky sondazh u krye nga një kompani amerikane e quajtur “Cygal”.
Pas verifikimit të fakteve nga hibrid.info, një sondazh i tillë nuk është gjetur i publikuar nga asnjë burim kredibil. Po ashtu, nuk ekziston asnjë kompani amerikane e quajtur “Cygal”.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
