Shkroi: Etrit Rexhepi
Publikohet një video-material që shfaq pamje të përhapjes së zjarrit në një territor, në mbishkrimin e së cilës pretendohet se bëhet fjalë për zjarret të cilat kanë përfshirë Los Anxhelosin në Shtetet e Bashkuara të Amerikës (ShBA).
Përmbajtja është publikuar dje (10 janar) në Facebook nga një faqe me emrin “Namazi”.
Cila është e vërteta?
Hibrid.info ka gjetur se Los Anxhelos është i përfshirë nga përhapja e madhe e zjarreve, por pamjet e paraqitura në video janë të gjeneruara nga Inteligjenca Artificiale (IA).
Deri në momentin e trajtimit, videoja ka marrë mbi 360 mijë shikime dhe është komentuar në mbi 750 herë.
Hibrid.info ka kontrolluar përmes “HiveModeration.com”, platformë për detektimin e përmbajtjeve të gjeneruara nga IA, në bazë të vlerësimit të së cilës, mund të konstatohet se pamja e trajtuar, është përmbajtje e gjeneruar nga IA.
Analiza:
Pretendimi për shpërthimin e zjarreve në Los Anxhelos është i saktë.
Por, në përmbajtjen e trajtuar pamjet e përhapjes së zjarrit në Los Anxhelos janë paraqitur me anë të gjenerimeve nga Inteligjenca Artificiale (IA).
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.